संस्थात्मक प्रसूतीत पापळ पीएचसी पहिली

अमरावती : ग्रामीण आरोग्य यंत्रणेच्या रुग्णालयांतील संस्थात्मक प्रसूतीत पापळ येथील प्राथमिक आरोग्य केंद्राने प्रथम क्रमांक मिळवला आहे. गत वर्षापासून २५५ संस्थात्मक प्रसूती पापळ पीएचसीत सुखरूप पार पडल्या. कोविड काळातही येथील संस्थात्मक प्रसूतीचा दर वाढला आहे.

माता व बालमृत्यूदर कमी होण्यासाठी संस्थात्मक प्रसूती होणे गरजेचे असते. आरोग्यविषयक निर्देशांकातही संस्थात्मक प्रसूती या घटकाची गणना होते. जिल्ह्यात ग्रामीण आरोग्य यंत्रणेच्या प्राथमिक आरोग्य केंद्र, उपकेंद्र व कार्यक्षेत्रातील खासगी संस्था मिळून ५,६६६ संस्थात्मक प्रसूती झाल्या. त्यातील २,८८५ प्रसूती प्राथमिक आरोग्य केंद्रात झाल्या. जिल्ह्यात एकूण ५९ पीएचसी आहेत. पापळ येथील पीएचसी केंद्रात अडीचशेहून अधिक प्रसूती सुखरूप करण्यात आल्या. पापळ केंद्राला यापूर्वी दोनवेळा आनंदीबाई जोशी पुरस्कार मिळाला आहे. या यशात तेथील आरोग्य सहायिका निर्मला लकडे यांचा महत्त्वाचा वाटा असल्याचे त्यांचे सगळे सहकारी व वरिष्ठ सांगतात. लकडे या २४ वर्षांपासून आरोग्यसेविका व नंतर सहायिका अशा पदावर कार्यरत आहेत. त्यांनाही फ्लॉरेन्स नाईटिंगेल पुरस्कार यापूर्वीच प्राप्त आहे.

कठीण शस्त्रक्रिया पार पाडतात

पापळ केंद्रात ३४ गावे जोडली आहेत. तिथे अनेकदा वाशिम, यवतमाळ जिल्ह्यातूनही केसेस येतात. कोविड काळात संपूर्ण सुरक्षितता व दक्षता पाळून शस्त्रक्रिया केल्या जातात. लकडे यांनी परिश्रमातून प्रसूती व संगोपनशास्त्रात कौशल्य मिळवले, त्या २४ वर्षांपासून निष्ठापूर्वक सेवा देत आहेत. त्यामुळे केंद्राचा लौकिक वाढला, असे त्यांचे सहकारी सांगतात. गतवर्षी समृद्धी महामार्गावर काम करणाऱ्या एका परप्रांतीय मजुराच्या पत्नीची प्रसूतीवेळी प्रकृती गंभीर झाली होती. बाळ गुदमरले होते. या मजुराला मराठी येत नसल्याने संवादाचीही काहीशी अडचण होती. त्यावेळी त्याच्या पत्नीची प्रकृती तपासून नेमकी समस्या काय आहे, हे श्रीमती लकडे यांनी समजून घेतले व क्षणाचाही विलंब न करता तातडीने हालचाली करून सुखरूप शस्त्रक्रिया पार पाडली. अशा अनेक कठीण शस्त्रक्रिया त्यांनी यशस्वी केल्याचे सहकारी सांगतात.

येथील टीमवर्क उत्तम

वैद्यकीय अधिकारी दीपक डाखोरे, आरोग्यसेविका सुमित्रा शेलोकार, आर. बी. गायकवाड, सुधीर बाळापुरे यांच्यासह सर्व स्टाफकडून उत्तमरीत्या टीमवर्क केले जाते. पापळ येथील सर्व सहकाऱ्यांचे पालकमंत्री यशोमती ठाकूर, जि. प. अध्यक्ष बबलू देशमुख, आरोग्य सभापती बाळासाहेब हिंगणीकर, जिल्हाधिकारी शैलेश नवाल, मुख्य कार्यकारी अधिकारी अविश्यांत पंडा यांनी कौतुक केले.