परतवाड्यात खासगी जिनिंग-प्रेसिंगला आग

अमरावती मार्गावरील खासगी औद्योगिक वसाहतीमधील आर.आर.अग्रवाल यांच्या जिनिंग प्रेसिंगला रविवारी दुपारी ३.३० वाजता भीषण आग लागली.

पाच अग्निशमन दाखल : कोट्यवधींचा कापूस खाक
परतवाडा : अमरावती मार्गावरील खासगी औद्योगिक वसाहतीमधील आर.आर.अग्रवाल यांच्या जिनिंग प्रेसिंगला रविवारी दुपारी ३.३० वाजता भीषण आग लागली. यात कोट्यवधींचे नुकसान झाल्याचा प्राथमिक अंदाज वर्तविला जात आहे.
परतवाडा-अमरावती मार्गावरील आर.आर.अग्रवाल यांच्या आर.आर. जिनिंगला आग लागून कापसाच्या तीन गंज्यांची राखरांगोळी झाली. परिसरात सर्वत्र धूर पसरला होता. खाजगी जिनिंग असलेल्या आर.आर. कॉटन प्रेसिंग शहराबाहेर असल्याने आगीचे वृत्त आगडोंब उसळायला लागल्यानंतर रस्त्याने ये-जा करणाऱ्यांना दिसून आले.
जवळपास तीन कोटी रुपयांच्या शेकडो क्विंटल कापसाच्या तीन गंज्यांना आग कशामुळे लागली याचे कारण स्पष्ट झाले नसले तरी, आगीच्या कारणाची चौकशी सुरू असल्याचे सांगण्यात आले. (तालुका प्रतिनिधी)

पाच अग्निशमन घटनास्थळी
आर.आर. जिनिंगला लागलेल्या आगीला विझविण्यासाठी अचलपूर, अंजनगाव सुर्जी, चांदूरबाजार व अमरावती येथून पाच अग्निशमन दलाने आग विझविण्यात आली. अग्निशमनसाठी बाजूच्या एका शेतातील विहिरीतून पाणी घेण्यात आले.