अंजनसिंगीतून प्रतिबंधित एचटीबीटी बियाणे जप्त

पान १

कृषी विभागाचे धाडसत्र : खरिपाच्या तोंडावर तस्कर सक्रिय, १५ लाखांचा मुद्देमाल

धामणगाव रेल्वे/तिवसा : धामणगाव रेल्वे तालुक्यातील अंजनसिंगी येथून सुमारे १४ लाख ५० हजार ३९७ रुपये किमतीचे प्रतिबंधित एचटीबीटी बियाणे जप्त करण्यात आले. १३ जून रोजी रात्री ९ च्या सुमारास ही कारवाई करण्यात आली. याप्रकरणी कुऱ्हा पोलिसांनी दोन आरोपींविरुद्ध गुन्हा दाखल केला. कृषी विभागाच्या धाडसत्रादरम्यान प्रतिबंधित बियाण्याच्या विक्रीचा हा प्रकार उघड झाला.

कुऱ्हा पोलीस ठाण्याच्या हद्दीत व धामणगाव रेल्वे तालुक्यातील अंजनसिंगी परिसरात काही व्यक्ती अनधिकृत कपाशी बियाण्याची विक्री करत असल्याची गोपनीय माहिती कृषी विभागाच्या अधिकाऱ्यांना मिळाली होती. त्याआधारे रविवारी रात्रीच्या सुमारास सापळा रचून कृषी विभागाचे पथक तिवसा तालुक्यातील दुर्गवाडा येथे पोहोचले. तेथे सतीश गणेश ठाकरे (३०) याच्याकडे प्रतिबंधित एचटीबीटी बियाण्याची मागणी करण्यात आली. त्याने बियाणे आणताच त्याला ताब्यात घेण्यात आले. ते बियाणे कुठून आणले, अशी विचारणा केली असता, त्याने आरोपी प्रमोद वामन देवघरे (रा. अंजनसिंगी) याच्याकडून आणल्याचे सांगितले. त्यामुळे कृषी विभागाने कुऱ्हा पोलिसांची मदत घेतली.

कुऱ्हा येथील पोलीस उपनिरीक्षक राजेश जोशी हे पथकासह अंजनसिंगी येथे पोहोचले. त्यांना प्रमोद देवघरे हा घरी नसल्याचे सांगण्यात आले. पथकाने त्याच्या घराच्या वरच्या माळ्याची झडती घेतली असता, तेथून एकूण ३९ गोण्यांमधील एकूण १८९१ कपाशी बियाणे पाकीट जप्त करण्यात आले. ही कारवाई जिल्हा गुणवत्ता नियंत्रण अधिकारी दादासो पवार, जिल्हा परिषदेचे प्रभारी कृषी विकास अधिकारी उज्ज्वल आगरकर, विभागीय गुणवत्ता नियंत्रक अनंत मस्करे, जिल्हा कृषी अधिकारी अजय तळेगावकर यांनी केली. कृषी विभागाने केलेल्या या कारवाईमुळे बोगस बियाणे विक्री करणाऱ्यांचे धाबे दणाणले आहे.

या कलमांन्वये गुन्हे

आरोपी सतीश ठाकरे व प्रमोद देवघरे यांच्याविरुद्ध कुऱ्हा पोलिसांनी भादंविचे कलम ४२०, ४६३, ४६३,४६५, ४६८, ४७१, ३४, बियाणे नियम १९६८ च्या ७, ८, ९, १०, ११, १२, १३, १४ तथा पर्यावरण संरक्षण अधिनियम १९८६ च्या ८, १५ (१), (२), १६(१) अन्वये गुन्हा दाखल केला आहे.