Railway Update: अमरावती-मुंबई एक्स्प्रेससह तीन गाड्या १४ व १५ ऑगस्टला रद्द

Railway Update: मध्य रेल्वेच्या भुसावळ मंडळाअंतर्गत येत असलेल्या पाचोरा रेल्वेस्थानकावर यार्ड रिमॉडेलिंगचे काम सुरु करण्यात येणार असल्याने मुंबई ते हावडा या व्यस्त मार्गावरील काही एक्स्प्रेस गाड्या १३, १४ व १५ ऑगस्ट रोजी रद्द करण्यात आल्या आहेत.

- अतुल जयस्वाल 

अकोला : मध्य रेल्वेच्या भुसावळ मंडळाअंतर्गत येत असलेल्या पाचोरा रेल्वेस्थानकावर यार्ड रिमॉडेलिंगचे काम सुरु करण्यात येणार असल्याने मुंबई ते हावडा या व्यस्त मार्गावरील काही एक्स्प्रेस गाड्या १३, १४ व १५ ऑगस्ट रोजी रद्द करण्यात आल्या आहेत. यामध्ये अकोला रेल्वेस्थानकावरून जाणाऱ्या अमरावती-मुंबई एक्स्प्रेससह तीन गाड्यांचा समावेश असल्याने अकोलेकर प्रवाशांना अडचणीचा सामना करावा लागणार आहे.

भूसावळ मंडळ कार्यालयाकडून प्राप्त माहितीनुसार, गाडी क्र. १२११२ अमरावती-मुंबई एक्स्प्रेस १४ ऑग्स्ट रोजी प्रस्थान स्थानकावरूनच रद्द करण्यात आली आहे. गाडी क्र. १२१११ मुंबई-अमरावती एक्स्प्रेस ही परतीची गाडी १५ ऑगस्ट प्रस्थान स्थानकावरूनच रद्द करण्यात आली आहे. गाडी क्र. १२१३६ नागपूर-पुणे त्रिसाप्ताहिक एक्सप्रेस १३ ऑगस्ट रोजी नागपुर येथून, तर १२१३५ पुणे-नागपूर त्रिसाप्ताहिक एक्स्प्रेस १४ ऑगस्ट रोजी आपल्या प्रस्थान स्थानकांवरून रद्द करण्यात आल्या आहेत. याशिवाय गाडी क्र. १२१४० नागपूर-मुंबई सेवाग्राम एक्स्प्रेस १४ ऑगस्ट रोजी प्रस्थान स्थानकावरून धावणार नाही. तसेच १२१३९ मुंबई-नागपूर सेवाग्राम एक्स्प्रेस १५ ऑगस्ट रोजी प्रस्थान स्थानकावरून रद्द करण्यात आली आहे.