पावसाने केले सळो की पळो!

अमरावती : जिल्ह्यात बुधवारी दुपारपासून विजांच्या कडकडाटाने सुरू झालेल्या पावसाच्या पाण्याने सात मंडळांमध्ये अतिवृष्टी आणली. धामणगाव, चांदूर रेल्वे, अमरावती, नांदगाव खंडेश्वर, तिवसा या पाच तालुक्यांमध्ये सातत्याने पाऊस कोसळत आहे.

अमरावती तालुक्यातील बडनेरा मंडळात १११.५ मिमी व शिराळा मंडळात ६२.५ मिमी पाऊस कोसळला. नांदगाव खंडेश्वर तालुक्यातील दाभा मंडळात ११६ मिमी व धानोरा मंडळात ९८.८ मिमी पाऊस कोसळला. परिणामी माहुली चोर येथे पुलावरून पाणी गेले. चांदूर रेल्वे तालुक्यातील आमला मंडळात ९३.५ मिमी पाऊस झाला. तिवसा तालुक्यातील मोझरी शिवारात ७२.३ मिमी पावसाची नोंद झाली, धामणगाव रेल्वे तालुक्यातील अंजनसिंगी महसूल मंडळात ६६.५ मिमी पावसाची नोंद झाली आहे. वरूड, मोर्शी, धारणी, चिखलदरा या तालुक्यांमध्ये पिकांना पावसाची ओढ लागली आहे.

---------------------

तालुकानिहाय बाधित गावांची संख्या

तिवसा तालुक्यात २२, भातकुली २३, चांदूर रेल्वे ५, धामणगाव रेल्वे २७, नांदगाव खंडेश्वर ५, मोर्शी ४, वरूड ७, अंजनगाव सुर्जी ८, अचलपूर २, धारणी १, चिखलदरा ५ अशी एकूण १०९ गावे बुधवारी रात्रीपासून कोसळलेल्या मुसळधार पावसाने बाधित झाली.

--------------

एक जण गेला वाहून

अंजनगाव सुर्जी तालुक्यातील निमखेड बाजार येथील ग्रामपंचायत कर्मचारी लखाड-खिराळा मार्गावरील पुलावरून पाय घसरल्याने वाहून गेला.

-------------------

९० प्रकल्पांत ८४.३८ टक्के साठा

दममदार पावसामुळे जिल्ह्यातील प्रकल्पांच्या पाणीसाठ्यात वाढ झाली आहे. एक मोठा पाच मध्यम व ८४ लघु अशा एकूण ९० प्रकल्पांत सरासरी ८४.३८ टक्के पाणीसाठा साचला आहे.

----------------------

१७ जणांचा रेस्क्यू

तिवसा तालुक्यातील भिवापूर तलावात अडकून पडलेल्या सहा जणांचा बुधवारी रात्रीपासून रेस्क्यू करण्यात आला. ते अमरावती शहरातील रहिवासी आहे. एकपाळा येथील त्रिवेणी संगमावर अडकलेल्या तिघांना पुरातून बाहेर काढण्यात आले. रायगड प्रकल्पाच्या पाण्यामुळे कोलाड नदीच्या पुरात पळसखेड, दिघी येथील आठ जण अडकून पडले होते. त्यांना सुखरूप बाहेर काढण्यात आले.

-------------------

२७८ घरांचे नुकसान

जिल्ह्यातील २७८ घरांचे २४ तासांच्या पावसात अंशत: नुकसान झाले, तर पाच घरे कोलमडून पडली. यात तिवसा तालुक्यातील ८७, भातकुली ७६, चांदूर रेल्वे १४, धामणगाव रेल्वे १७, नांदगाव खंडेश्वर ५१, मोर्शी ७, वरूड ९, अंजनगाव सुर्जी ९, अचलपूर २, धारणी १ व चिखलदरा तालुक्यातील ५ अशा २७८ घरांचे अंशत: नुकसान झाले. नांदगाव खंडेश्वर तालुक्यातील ३, वरूड १, अंजनगाव १ अशी पाच घरे पूर्णत: कोलमडली.

---------------------

३२५ हेक्टरमध्ये पिकांचे नुकसान

पावसामुळे सर्वाधिक धामणगाव रेल्वे तालुक्यात १२० हेकटरमध्ये नुकसान झाले. नांदगाव खंडेश्वर तालुक्यात ९२, मोर्शी २०, वरूड ७८, अंजनगाव सुर्जी १५ अशा पाच तालुक्यात ३२५ हेक्टरवरील पिकांचे नुकसान झाल्याचा प्राथमिक अंदाज महसूल विभागाने वर्तविला आहे.

------------