दत्तापूर पोलिसांना राखीचे बंधन

भाजपा महिला आघाडीने बांधल्या पोलिसांना राख्या

फोटो - दत्तापूर २२ पी

धामणगाव रेल्वे : भाजपा शहर महिला आघाडीच्यावतीने दत्तापूर पोलीस ठाण्यात कार्यरत कर्मचाऱ्यांना राखी बांधून रक्षाबंधनाचा सण साजरा करण्यात आला. या कार्यक्रमाला अनेक पोलिसांनी हजेरी लावत भगिनींच्या रक्षणाचे वचन दिले.

रक्षाबंधन असो, वा अन्य कोणताही सण, पोलिसांना शहरातील शांतता, कायदा सुव्यस्था सांभाळण्यासाठी कामावर हजर राहावे लागते. त्यामुळे अनेकदा आपल्या बहिणीसोबत रक्षाबंधनासारखा सण साजरा करता येत नाही. त्यामुळे भाजपा शहर महिला आघाडीने यंदाचे रक्षाबंधन पोलिसांसोबत साजरे करण्याचे ठरवले. यावेळी पोलिसांनी आपल्या दैनंदिन कामकाजाबाबत, तसेच शस्त्रे, दारूगोळा याबाबत माहिती दिली. भाजप शहर महिला आघाडी अध्यक्ष नलिनी मेश्राम यांच्या पुढाकाराने हा सण साजरा करता आल्याच्या भावना दत्तापूरचे ठाणेदार राठोड यांनी व्यक्त केली. मानवधिकार आयोगाचे जिल्हा उपाध्यक्ष संजय सायरे, भाजप महिला आघाडीच्या जिल्हा उपाध्यक्ष उषा तिनखेडे, शहराध्यक्ष नलिनी मेश्राम, नगरसेविका अर्चना गोडबोले, अर्चना ठाकरे, सीमा देवतळे, दर्शना ठाकूर, भाजप महिला आघाडी सरचिटणीस ज्योती पाटील, रीता बोरगावकर आदी यावेळी उपस्थित होत्या.