भाड्याने घर देण्यास मनाई, घरमालकावर काठीने हल्ला

अमरावती : भाड्याने घर देण्यास मनाई केल्याच्या कारणावरून एका घरमालकावर काठीने हल्ला चढवून जिवे मारण्याचा प्रयत्न करण्यात आला. इतकेच नव्हे तर किराणा दुकानाची तोडफोड करून गल्ल्यातील सहा हजार रुपये हिसकावून खंडणीसुध्दा मागण्यात आली. ही घटना बुधवारी रात्री गाडगेनगर हद्दीतील अलहिलाल कॉलनीत घडली.

याप्रकरणात गाडगेनगर पोलिसांनी आरोपी रहीम बिल्डर उर्फ रहीम खान कादर खान (३७, सहारा कालोनी) आणि जुबेर खान अफजल खान (२०, रा. सहारा कॉलनी) यांच्याविरुध्द गुन्हा नोंदवून, त्यांना अटक केली आहे. यासंदर्भात फिर्यादी फिरोज खान रहीम खान (४५, रा. पॅराडाइज कॉलनी) यांच्या तक्रारीवरून सदर गुन्हा नोंदविण्यात आला.

अलहिलाल कॉलनीत फिरोज खानव्दारा संचालित खान ट्रेडींग कंपनी आहे. हे दुकान त्यांचा भाचा सोहेल खान कैसर खान सांभाळत आहे. १५ दिवसांपूर्वी शारीक नामक एका व्यक्तीला फिरोज खान यांचे मोठे भाऊ कैसर खान यांनी वाहेद कॉलनीतील घर भाड्याने दिले होते. बुधवारी शारीक यांच्या खोलीवर रहीम बिल्डर सामान आणत असल्याचे फिरोज खानला दिसले. त्यामुळे त्यांनी रहिम बिल्डरला हटकले. त्यामुळे रहीम बिल्डरसह त्याचा साथीदार जुबेर खानने काठीने फिरोज खानवर प्राणघातक हल्ला चढविला. तसेच खान ट्रेडींग या दुकानात शिरून काठ्यांनी तोडफोड केली. दुकानातील गल्ल्यातील ६ हजारांची रोख जबरीने काढून घेतली आणि कांचेच्या बॉटलची तोडफोड केली. तसेच व्यवसाय करायचा असेल, तर हप्ता द्यावा लागेल, अन्यथा तुझ्या भावाला आणि भाच्याला जिवाने मारून टाकेन, अशी धमकीही बिल्डर रहिमने दिली. या घटनेच्या माहितीवरून गाडगेनगर पोलिसांनी दोन्ही आरोपींना अटक केली. पुढील तपास वरिष्ठ पोलीस निरीक्षक आसाराम चोरमले करीत आहेत.