खून का बदला खून; फ्रेजरपुऱ्यात अल्पवयीनाची हत्या

अमरावती : ‘खून का बदला खून’ म्हणत एका १७ वर्षीय मुलाची चाकूने वार करून निर्घृण हत्या करण्यात आली. फ्रेजरपुरास्थित सिद्धार्थ क्रीडा मंडळासमोर गुरुवारी दुपारी १२ च्या सुमारास हा रक्तरंजित थरार घडला. प्रत्यक्षदर्शीनुसार, तीन हल्लेखोर त्याचा खून करून पळून गेले. जुन्या वैमनस्यातून ही हत्या घडल्याची पोलिसांनी सांगितले. अनिकेत ज्ञानदीप कोकणे (१७, रा. यशोदानगर क्रमांक १) असे मृताचे नाव आहे. त्याआधारे फ्रेजरपुरा पोलिसांनी आरोपींचा शोध चालवून दोघांना ताब्यात घेतले आहे.

पोलीस सूत्रानुसार, गुरुवारी दुपारी अनिकेत हा एटीएम सेंटरवर पैसे काढण्यास गेला होता. त्याच्या मागावर असलेल्या तीन आरोपींनी त्याचा पाठलाग केला. तेथून जीव वाचविण्यासाठी अनिकेतने दुचाकी पळविली. मात्र, एका ठिकाणी रस्ता बंद असल्याने त्याने दुचाकी सोडून पळ काढला. फ्रेजरपुरास्थित सिध्दार्थ क्रीडा मंडळासमोर राहणाऱ्या एका व्यक्तीच्या घराकडे धाव घेताना आरोपींनी त्याला पकडले. अनिकेतला पायऱ्यावर गाठून त्याच्या गळ्यावर, मानेवर चाकूचे वार करण्यात आले. खून केल्यानंतर तीनही आरोपींनी तेथून पळ काढला.

पोलीस घटनास्थळी

फ्रेजरपुऱ्याचे ठाणेदार पुंडलिक मेश्राम, पोलीस निरीक्षक नितीन मगर हे पथकासह घटनास्थळी पोहोचले. तेथून सीसीटीव्ही फुटेज जप्त करण्यात आले. काहींनी खून होत असताना व्हिडीओ काढल्याची माहिती प्रत्यक्षदर्शींनी दिली. त्यांचादेखील पोलीस शोध घेत आहे. घटनास्थळी मोठी गर्दी जमल्याने पोलिसांना अतिरिक्त कुमक बोलवावी लागली. पोलिसांनी मृतदेह इर्विनला हलविला. याबाबत मृताच्या पित्याने फ्रेजरपुरा पोलिसात तक्रार नोंदविली. आरोपींविरूद्ध खुनाचा गुन्हा दाखल करण्यात आला.

खुनाचा आरोप

डिसेंबर २०२० मध्ये बंटी बारसेची हत्या करण्यात आली होती. त्यात अनिकेत कोकणे आरोपी होता. भावाच्या खुनाचा बदला म्हणून गुरुवारी तिघांनी अनिकेतला संपविल्याची प्राथमिक माहिती फ्रेजरपुरा पोलिसांच्या हाती आली आहे.

कोट