सई फिरके राष्ट्रीय संघात

अमरावती : शांतीनगर येथील साक्षरा पॅराडाईज इंग्लिश हायस्कूलची विद्यार्थिनी सई अमरेंद्र फिरके हिची १९ वर्षांखालील राष्ट्रीय हँडबॉल संघात निवड झाली आहे. ४ ते १२ सप्टेंबर दरम्यान राष्ट्रीय हँडबॉल स्पर्धा पार पडली. यात तिने उत्तम प्रदर्शन केले. मुख्याध्यापिका व शाळा प्रशासनाने तिच्या यशाचे कौतुक केले.

-------------------

खालखोनी येथे दोन वर्गखोल्या मंजूर

भातकुली : तालुक्यातील खालखोनी येथे जिल्हा परिषद शाळेच्या दोन वर्गखोल्या मंजूर करण्यात आल्या आहेत. उपसरपंच दिनेश खाडे, पप्पू देशमुख व नागरिकांनी याबाबत जिल्हा परिषद अध्यक्ष बबलू देशमुख यांचे आभार मानले.

------------

अल्पवयीन मुलीवर अत्याचार

परतवाडा : स्थानिक पोलीस ठाण्याच्या हद्दीतील एका गावात दुपारी घरी एकटीच असलेल्या १५ वर्षीय मुलीवर २२ वर्षीय युवकाने अत्याचार केला. पोलिसात तक्रार दिल्यास जीव घेईन, अशी धमकी त्याने दिली होती. त्यामुळे तब्बल १४ दिवस तिने आई-वडिलांना सांगितले नव्हते. अखेर आई-वडिलांना सांगितल्यानंतर १८ सप्टेंबर रोजी तक्रार देण्यात आली. परतवाडा पोलिसांनी भादंविचे कलम ३७६ (३), ४५२, ५०६ तसेच पोक्सो अन्वये गुन्हा नोंदविला.

--------------

म्हसोना येथे विवाहितेचा विनयभंग

परतवाडा : स्थानिक पोलीस ठाण्याच्या हद्दीतील म्हसोना येथे २१ वर्षीय विवाहितेचा रावजी लालमन जामूनकर या ३५ वर्षीय इसमाने हात पकडला व तू मला आवडते, असे म्हणून विनयभंग केला. कोणाला सांगितले तर पाहून घेईन, अशी धमकीही दिली. पोलिसांनी त्याच्याविरुद्ध गुन्हा नोंदविला आहे.

---------------------

पार्डी शिवारातून मोटरपंप लंपास

मोर्शी : तालुक्यातील पार्डी शिवारात विनोद मारोतराव खरपकर (४८) यांच्या शेतातील तीन एचपीचा मोटरपंप अत्रात चोरट्याने १६ सप्टेंबरच्या रात्री लंपास केला. मोर्शी पोलिसांनी गुन्हा नोंदविला आहे.