समृद्धी महामार्गाच्या सुरक्षा रक्षकाला मारहाण

मंगरूळ चव्हाळा : समृद्धी महामार्गाच्या सुरक्षा रक्षकाला रविवारी सकाळी एका जणाने जबर मारहाण केली. याप्रकरणी मंगरूळ दस्तगीर पोलिसांनी गुन्हा दाखल केला आहे.

नांदगाव खंडेश्वर तालुक्यातील पिंपळगाव निपाणी येथील रहिवासी मारोतराव नारायण कवळकर (५७) हे नेहमीप्रमाणे लोहगाव येथील समृद्धी महामार्गाच्या पॉइंट क्रमांक १५६ वर निगराणी करीत होते. १४ फेब्रुवारीला सकाळी ८ वाजता अक्षय गोडेस्वार (२२, रा. पिंपळगाव निपाणी) यांनी प्रथम त्यांना चिडविले व त्यानंतर लोखंडी रॉडने मारहाण केली. तुला आणखी मारणार, अशी धमकी देऊन अक्षयने पळ काढला. मारोतराव कवळकर हे रक्तबंबाळ अवस्थेत दिसताच मुलगा तुळशीदास कवळकर यांनी संबंधित कंत्राटदार कंपनीच्या वाहनाने नांदगाव खंडेश्वर येथील प्राथमिक आरोग्य केंद्रात त्यांना दाखल केले. पुढील उपचारासाठी अमरावती येथे हलविण्यात आले. तुळशीदास कवळकर यांच्या फिर्यादीवरून मंगरूळ दस्तगीर पोलिसांनी गुन्हा दाखल केला आहे.