जिल्ह्यात अंगणवाडी केंद्रात सावित्री उत्सव

‘उत्सव सावित्रीचा - जागर स्त्रीशक्तीचा’, अंगणवाडी सेविका, मदतनिसांचा सन्मान

अमरावती : एकात्मिक बाल विकास सेवा योजना, अमरावती अंतर्गत जिल्ह्यातील विविध अंगणवाडी केंद्रे/गावात रविवारी सावित्री उत्सव मोठ्या उत्साहात साजरा करण्यात आला. ‘उत्सव सावित्रीचा - जागर स्त्रीशक्तीचा’ ही संकल्पना ठेवून संपूर्ण जिल्हाभर यानिमित्ताने विविध कार्यक्रमांचे आयोजन करण्यात आले. या अंतर्गत सकाळी स्त्रीशिक्षणविषयक जागरूकता निर्माण व्हावी म्हणून सावित्री दिंडीचे आयोजन करण्यात आले.

अंगणवाडी, गावातील लहान मुलींना क्रांतिज्योती सावित्रीबाई फुले यांचा पहेराव करून स्त्रीशिक्षणाचे आवाहन करण्यात आले. गावात नवजात मुलीच्या जन्माचे ठिकठिकाणी स्वागत करण्यात आले . कोविड-१९ अंतर्गत उल्लेखनीय काम करणाऱ्या अंगणवाडी सेविका, मदतनीस यांचा सत्कार करण्यात आला. मुलींच्या जन्मदरात वाढ व्हावी, मातांमध्ये आहाराविषयी जागरूकता निर्माण व्हावी, यासाठी पोषण आहारासंबंधी प्रबोधन करणारे कार्यक्रमाचे आयोजन करण्यात आले.