लग्न जुळल्यावर नियोजित वराने केले भावी पत्नीचे लैंगिक शोषण

अमरावती : नियोजित वरानेच भावी पत्नीचे लैंगिक शोषण केल्याची धक्कादायक घटना शुक्रवारी अमरावती येथे उघडकीस आली.

याप्रकरणी पीडित महिलेच्या तक्रारीवरून वलगाव पोलिसांनी शुभम गजानन भागेवार (२७), ५८ वर्षीय पुरुष व एका महिलेविरुद्ध गुन्हा नोंदविला. सदर घटना १५ जानेवारी ते ३१ मे २०२१ दरम्यान पुण्यात घडली. अमरावतीतील एक तरुणीचे पुणे शहरातील शुभम भागेवारसोबत साखरपुडा झाला होता. त्यानंतर तरुणी नोकरीनिमित्त पुणे येथे गेली. नियोजित वर शुभम तिच्या रूमवर ये-जा करीत होता. आता लग्नच होणार आहे, असे सांगून त्याने तिच्याशी अनेकदा शारीरिक संबंध प्रस्थापित केले. फसवणूक झाल्याचे लक्षात येताच तरुणीने वलगाव पोलीस ठाण्यात तक्रार नोंदविली. आरोपीच्या आई-वडिलांनी सदर तरुणीचे मुलासोबत लग्न लावून देतो, असे आश्वासन दिले होते. म्हणून पोलिसांनी त्यांच्यावरही गुन्हा नोंदविला.

दरम्यान, घटनास्थळ हे पुण्याच्या देहू रोड पोलीस ठाण्याच्या हद्दीतील असल्याने वरिष्ठांच्या आदेशाने सदरची प्रथम खबरी व तपासाची कागदपत्रे वर्ग करण्यात येणार आहेत. आरोपींविरुद्ध भादविचे कलम ३७६,(२),(एन), ४१७ ,३४ नुसार गुन्हा नोंदविला आहे.