लग्नाचे आमिष दाखवून तरुणीवर लैंगिक अत्याचार

अमरावती : फेसबूकवरून ओळख झालेल्या तरुणीवर एक सैनिकाने लग्नाचे आमिष दाखवून तिच्यावर वारंवार लैंगिक अत्याचार केल्याची धक्कादायक घटना फ्रेजरपुरा ठाणे हद्दीतील कुऱ्हा मार्गावरील ठाकूर लॉजवर सप्टेंबर २०२० ते २२ जून २०२१ दरम्यान घडली. तरुणीच्या तक्रारीवरून फ्रेजरपुरा पोलिसांनी आरोपीविरुद्ध शनिवारी रात्री उशिरा गुन्हा नोंदविला.

पोलीस सूत्रानुसार, सागर किसन शिंदे (३०, रा. नरसरी गौरखेडा, ता. परतवाडा) असे आरोपीचे नाव असून पीडितेला शिवीगाळ व धमकाविल्याबदल मुख्य आरोपीच्या इतर तीन नातेवाइकांवरसुद्धा पोलिसांनी गुन्हा नोंदविला. प्राप्त माहितीनुसार, २८ वर्षीय तरुणीशी आरोपीची फेसबूकवरून ओळख झाली. त्यानंतर तिचा मोबाईल नंबर घेऊन बोलू लागला. गावी आल्यानंतर तो तिला भेटला. त्यानंतर त्याने लॉजवर नेऊन तिच्याशी शारीरिक संबंध प्रस्थापित केले. तरुणीने लग्नासंदर्भात विचारले असता, लग्न करण्यास नकार दिला. त्यानंतर तिने ठाण्यात धाव घेतली. आरोपींविरुद्ध भादंविची कलम ३७६ (२)(एन), ४१७, ३५२, ५०४, ५०६ ३४ अन्वये गुन्हा नोंदविला. पुढील तपास ठाणेदार पुंडलिक मेश्राम यांच्या मार्गदर्शनात फ्रेजरपुरा पोलीस करीत आहेत.