दोघींवर लैंगिक अत्याचार, एकीचा विनयभंग

जागतिक महिला दिनाच्या पूर्वसंध्येला गुरुवारी शहर महिलाविषयक गंभीर गुन्ह्यांनी हादरले. एक अल्पवयीन मुलगी व एका तरुणीवर लैंगिक अत्याचार झाला, तर दोन तरुणींचा विनयभंग करण्यात आल्याच्या धक्कादायक घटना उघडकीस आल्या आहेत. यामध्ये गाडगेनगर पोलिसांनी लैंगिक अत्याचारातील दोन आरोपींना अटक केली. खोलापुरी गेट हद्दीत विनयभंग प्रकरणातील आरोपी गजाआड करण्यात आला, तर गाडगेनगर हद्दीतील आरोपी अद्याप पसार आहे.

ठळक मुद्देमहिला दिनाच्या पूर्वसंध्येला शहरात चार घटना : तीन आरोपी अटकेत, एक पसारमहिला असुरक्षितच

लोकमत न्यूज नेटवर्क
अमरावती : जागतिक महिला दिनाच्या पूर्वसंध्येला गुरुवारी शहर महिलाविषयक गंभीर गुन्ह्यांनी हादरले. एक अल्पवयीन मुलगी व एका तरुणीवर लैंगिक अत्याचार झाला, तर दोन तरुणींचा विनयभंग करण्यात आल्याच्या धक्कादायक घटना उघडकीस आल्या आहेत. यामध्ये गाडगेनगर पोलिसांनी लैंगिक अत्याचारातील दोन आरोपींना अटक केली. खोलापुरी गेट हद्दीत विनयभंग प्रकरणातील आरोपी गजाआड करण्यात आला, तर गाडगेनगर हद्दीतील आरोपी अद्याप पसार आहे.
गाडगेनगर पोलीस ठाण्याच्या हद्दीतील एका घरात घुसून मद्यपीने महिलेची छेडखानी केल्याचा धक्कादायक प्रकार गुरुवारी उघडकीस आला. पम्या हंबर्डे (रा. नवसारी) असे आरोपीचे नाव आहे. पीडिताच्या तक्रारीनुसार, २८ जानेवारी रोजी सायंकाळी ६ वाजता आरोपी हा शिरला. त्याने महिलेला घरात एकटीच पाहून शिवीगाळ करून छेडखानी केली. महिलेने आरडाओरड केल्यानंतर शेजारी धावून गेले. त्यामुळे पुढील अनर्थ टळला. पीडित महिलेने गाडगेनगर पोलिसांत गुरुवारी तक्रार नोंदविली. त्यानुसार पोलिसांनी आरोपीविरुद्ध गुन्हा नोंदविला आहे.
जागतिक महिला दिनानिमित्त शुक्रवारी शहरातील महिलांसह पुरुषांमध्येही प्रचंड उत्साह दिसून आला. मात्र, पूर्वसंध्येलाच महिलाविषयक अत्याचार व छेडखानीच्या घटना पुढे आल्यामुळे शहरात खळबळ उडाली होती.
अल्पवयीन मुलीवर लैंगिक अत्याचार
गाडगेनगर हद्दीत राहणाऱ्या एका वृद्धेने अल्पवयीन नातीवर झालेल्या लैंगिक अत्याचाराची तक्रार गुरुवारी गाडगेनगर पोलिसांनी नोंदविली. वैभव बाळासाहेब देशमुख (रा. अंबागेट, बुधवारा चौक) हा घरी येत होता. घरात कोणी नसल्याचे पाहून त्याने नातीसोबत जबरीने शारीरिक संबंध प्रस्थापित केले, अशी तक्रार आजीने नोंदविली. पोलिसांनी आरोपी वैभवविरुद्ध भादंविच्या कलम ३७६ तसेच ४, ८, १२ पोक्सो कायद्यान्वये गुन्हा नोंदवून त्याला अटक केली. उपनिरीक्षक शकंर डेडवाल यांनी प्राथमिक तपास केला.
लग्नाचे आमिष दाखवून बलात्कार
लग्नाचे आमिष दाखवून एका तरुणाने खासगी रुग्णालयातील परिचारिकेवर लैंगिक अत्याचार केल्याची घटना गुरुवारी गाडगेनगर हद्दीत उघडकीस आली. पीडित मुलीचे वडील पोलीस खात्यात असून, त्यांच्या मित्रासोबत आरोपी निखिल गजभिये (२९, रा. परतवाडा) हा पीडिताच्या घरी येत होता. ओळखीतून निखिलने मुलीला लग्नाचे आमिष दाखवून प्रेमजाळ्यात फासले. त्यानंतर जबरदस्तीने लैंगिक संबध ठेवल्याचा आरोप पीडिताने केला आहे. या घटनेच्या तक्रारीवरून गाडगेनगर पोलिसांनी आरोपीविरुद्ध भादंविच्या कलम ३७६(२), (एन) अन्वये गुन्हा नोंदवून आरोपीला अटक केली.
वडिलांकडून ‘बॅड टच’चा अनुभव
खोलापुरी गेट ठाण्यातील एका अल्पवयीन मुलीवर तिच्या पित्यानेच वाईट नजर ठेवल्याचा धक्कादायक प्रकार घडला आहे. वडील व मावशीच्या पतीने २०१४ पासून तर ३ मार्च २०१९ दरम्यान वाईट नजर ठेवून अंगाला वाईट हेतूने स्पर्श करणे, इच्छेविरुद्ध जबरदस्तीने जवळ बसविणे, केसातून व अंगावरून हात फिरविण्यासारखे प्रकार केल्याचे पीडिताने तक्रारीत म्हटले आहे. प्रकरणाचे गांभीर्य लक्षात घेऊन खोलापुरी गेट पोलिसांनी आरोपी वडील व मावशीच्या पतीविरुद्ध भादंविच्या कलम ३५४, ३५४ (अ), सहकलम ८, १२ पोक्सो कायद्यान्वये गुन्हा नोंदविला.