शंकरबाबांचा नरबळी प्रकरणाशी संबंध नाही

प्रथमेश आणि अजय यांच्यावर पिंपळखुटा येथील आश्रम परिसरात झालेल्या हल्ल्याशी शंकरबाबांचा दुरान्वयानेही संबंध नसल्याचे मतप्रदर्शन आश्रमातून आलेल्या काही समर्थकांनी आज येथे केले.

समर्थकांचा मोर्चा : जिल्हाधिकाऱ्यांना निवेदन
अमरावती : प्रथमेश आणि अजय यांच्यावर पिंपळखुटा येथील आश्रम परिसरात झालेल्या हल्ल्याशी शंकरबाबांचा दुरान्वयानेही संबंध नसल्याचे मतप्रदर्शन आश्रमातून आलेल्या काही समर्थकांनी आज येथे केले.
इर्विन चौकात एकत्रित आलेल्या या समर्थकांनी जिल्हाधिकारी कार्यालयापर्यंत मोर्चा नेला. नरबळी प्रकरणावर लिखाण करणाऱ्यांचा त्यांनी मोर्चादरम्यान निषेध केला. जिल्हाधिकारी कार्यालयाजवळ मोर्चाचे रुपांतर सभेत झाले. यावेळी शंकर महाराजांच्या समर्थकांची भाषणे झालीत. आश्रमाला विनाकारण बदनाम केले जात असल्याच्या भावना भाषणातून व्यक्त करण्यात आल्या. प्रथमेश आणि अजय यांच्यावर नरबळीच्या हेतूने झालेल्या हल्ल्याविषयी लिखाण करणाऱ्या वृत्तपत्रांची यावेळी होळी करण्यात आली. समर्थकांमधील मोजक्या समर्थकांचे शिष्टमंडळ जिल्हाधिकाऱ्यांना भेटले. शंकरबाबा नरबळीसाठी झालेल्या हल्ल्याशी संबंध नाही. गुन्ह्यातील आरोपी अटक करण्यात आले आहेत. नरबळी हल्लाप्रकरणी सातत्याने लिखाण करणाऱ्या माध्यमांवर, पत्रकारावर कारवाई करण्याची मागणी यावेळी करण्यात आली. चोख पोलीस बंदोबस्त ठेवण्यात आला होता.