महिला आयोगासमोर पेशी होण्यापूर्वीच श्रीनिवास रेड्डींना अटक

कॅप्शन - राज्य महिला आयोगाने रेड्डींना दिलेल्या डेडलाईनसंबंधी वृत्त.

-----------------------------------------------------------------------

३० एप्रिलपर्यंत जबाब दाखल करण्यासाठी मागितला होता वेळ, धारणी पोलीस ठाण्याच्या लाॅकअपमध्ये मुक्काम

अमरावती : वनपरिक्षेत्र अधिकारी दीपाली चव्हाण आत्महत्याप्रकरणी राज्य महिला आयोगाने तत्कालीन अपर प्रधान मुख्य वनसंरक्षक श्रीनिवास रेड्डी यांना जबाब दाखल करण्यासाठी कारणे नोटीस बजावली होती. रेड्डी यांनी नोटीसला उत्तर देण्यासाठी ३० एप्रिलपर्यंत वेळ मागितला होता. तथापि, २९ एप्रिल रोजी धारणी पोलिसांनी रेड्डींना अटक केल्यामुळे महिला आयोगापुढे जबाब दाखल करण्याची डेडलाईन ‘जैसे थे’ राहिली आहे.

‘लोकमत’मध्ये २६ मार्च २०२१ रोजी ‘महिला आरएफओंची गोळी झाडून आत्महत्या, हरिसाल येथील घटना, मानसिक व वैयक्तिक आरोप, सुसाईड नोटमध्ये उपवनसंरक्षकांचे नाव’ या आशयाचे वृत्त प्रकाशित झाले होते. या वृत्ताची दखल घेत २९ मार्च रोजी राज्य महिला आयोगाच्या सदस्य सचिव अनिता पाटील यांनी श्रीनिवास रेड्डी यांना राज्य महिला आयोग अधिनियम १९९३, कलम १०(२) नुसार तक्रार निवारणार्थ नोटीस बजावली होती. मात्र, रेड्डी यांच्यावरील निलंबनाच्या कारवाईमुळे त्यांनी महिला आयोगाला नोटीसचे जबाब नोंदविण्यासाठी ३० एप्रिलपर्यंत अवधी मागितला होता. रेड्डी हे वकिलांमार्फत राज्य महिला आयोगाकडे प्रकरणाशी निगडीत बाबींवर जबाब सादर करणार होते. मात्र, आयपीएस चौकशी पथकप्रमुख डॉ. प्रज्ञा सरवदे यांनी दीपाली आत्महत्याप्रकरणी श्रीनिवास रेड्डींच्या अटकेचे आदेश दिलेत. त्यानुसार नागपूर येथून रेड्डींना नागपूर क्राईम ब्रँच व अमरावती पोलिसांच्या पथकाने २८ एप्रिल रोजी सायंकाळी उशिरा रेड्डींना ताब्यात घेतले. धारणी पोलीस ठाण्यात २९ एप्रिल रोजी सकाळी ६ वाजता अटक करण्यात आल्याची नोंद घेण्यात आली. आता रेड्डी पोलिसांच्या ताब्यात असल्याने महिला आयोगाकडे सादर करावयाचा जबाब लांबणीवर पडला, हे विशेष.

--------------------

रेड्डींच्या अटकेने आयएफएस लॉबी हादरली

अपर प्रधान मुख्य वनसंरक्षक हे पद राज्य शासनात अपर प्रधान सचिव दर्जाचे आहे. नोकरशाहीत आयपीएस, आयएएस याचप्रमाणे आयएफएस लॉबी सक्रिय आहे. तथापि, एपीसीसीएफ श्रीनिवास रेड्डींचे निलंबन व अटकेच्या कारवाईने आयएफएस लॉबी हादरून गेली आहे. सोशल मीडियावर रेड्डींच्या अटकेबाबत दोन मतप्रवाह आहेत. रेड्डींना आरोपी म्हणून दिलेली वागणूक बघून आयएफएस लॉबीला शॉक बसला आहे. रेड्डींच्या दिमतीला तीन शासकीय वाहने, मोठा बंगला, नोकऱ-चाकर, आजूबाजूला नियमित ‘यस सर’ म्हणणारे अधिकारी, कर्मचारी हा बडेजाव दीपाली प्रकरणाने संपुष्टात आला. त्यामुळे आता आयएफएस अधिकारी सावध झाल्याचे चित्र आहे.