दगडाने ठेचून अनोळखी इसमाची हत्या

एक्सप्रेस महामार्गालगत ३५ वर्षीय अनोळखी इसमाची दगडाने डोके ठेचून हत्या केल्याची घटना ४ जानेवारी रोजी उघडकीस आली.

बडनेरा येथील घटना : इसम ट्रकचा क्लिनर असल्याचा अंदाज
बडनेरा : एक्सप्रेस महामार्गालगत ३५ वर्षीय अनोळखी इसमाची दगडाने डोके ठेचून हत्या केल्याची घटना ४ जानेवारी रोजी उघडकीस आली. सदर प्रकरणी बडनेरा पोलिसांनी हत्येचा गुन्हा दाखल केला आहे. मृतदेह रक्ताच्या थारोळ्यात पडला आढळला.
वरुडा गावापासून जाणाऱ्या एक्स्प्रेस महामार्गावर मृतदेह आढळून असल्याची माहिती बडनेरा पोलिसांना ४ जानेवारी रोजी सकाळच्या सुमारास कळली. महामागाच्या कडेला असणाऱ्या ३० ते ३५ वर्षीय इसमाच्या डोक्याला जबर मार होता. त्याचे डोके दगडाने ठेचल्याने चित्र होते. मृतदेहाजवळ रक्ताने माखलेले दगड होते. घटनास्थळी पोलीस सहायक आयुक्त महेश जोशी, पोलीस निरीक्षक विजय साळुंखे, गुन्हे शाखेचे पोलीस निरीक्षक दिलीप पाटील पोहचले होते. मृत अनोळखी इसमाच्या हातावर मनोज असे नाव गोंदले आहे. त्याने पांढऱ्या रेखा असणाऱ्या शर्ट, भुरकट पॅन्ट, काळे जोडे परिधान केले आहे. त्याच्या खिशात राजाशक्ती तंबाखु पुडी व चिल्लर पैसे पोलिसांना आढळून आले.
घटनास्थळी श्वान पथक बोलविण्यात आले होते. श्वान थोड्या अंतरापर्यंत जाऊन थांबला. बडनेरा पोलिसांनी याप्रकरणी भादंविच्या कलम ३०२ अन्वये गुन्हा दाखल केलेला आहे.
मृतदेहाची ओळख पटविण्यासाठी परिसरातील लोकांना मृतदेह दाखविण्यात आला. मृतदेह एखाद्या ट्रकचा क्लिनर असावा, असा कयास पोलिसांचा आहे. अद्याप पोलिसांच्या हाती या कुठलीच ठोस माहिती आलेली नाही. अधिक तपास पोलीस निरीक्षक साळुंखे करीत आहे.