चार खासगी रुग्णालयांवर कडक कारवाईची शिफारस

अमरावती : खासगी रुग्णांलयाद्वारा कोविड, नॉनकोविड रुग्णालयांची तपासणी करण्यासाठी गठित जिल्हा पथकाने शनिवारी चार खासगी रुग्णालयांना अचानक भेट दिली असता, अवास्तव बिलांच्या आकारणीसह अनेक नियमबाह्य प्रकार पथकाच्या निदर्शनास आले. त्यामुळे पथकाद्वारा महापालिका आयुक्तांना शनिवारी अहवाल सादर करून कडक कारवाईची शिफारस करण्यात आली.

कोविड, नॉनकोविड रुग्णांवर खासगी रुग्णालयांमध्ये तपासणी व चाचण्यांकरिता शासनाद्वारा दर निश्चित केले आहे. त्यानुसार रुग्णांकडून आकारणी करणे अनिवार्य आहे. या दर पत्रकांनुसारच आकारणी होते की, कसे याबाबतची तपासणी करण्याकरिता जिल्हाधिकारी शैलेश नवाल यांच्याद्वरा ९ सप्टेंबर २०२० रोजी जिल्हा पथक गठन करण्यात आले. या पथकाद्वारा ‘एमजेपीजेएवाय व पीएमजेएवाय’ योजनेचे काम देखील पाहण्यात येते.

या पथकात उपजिल्हाधिकारी राम लंके, लेखाधिकारी नरेंद्र भटूरकर, जिल्हा समन्वयक सचिन सानप, सहायक विलास घाटे, नितीन पडकुले, राजेश शर्मा यांचा समावेश आहे. शनिवारी जिल्हा टास्क फोर्सची बैठक झाल्यानंतर जिल्हाधिकाऱ्यांच्या निर्देशानुसार पथकाद्वारा चार खासगी रुग्णालयांमध्ये दाखल रुग्णांच्या देयकांची नमुना तपासणी अचानक करण्यात आली. यात मोठ्या प्रमाणात त्रुटी, रुग्णांकडून अवास्तव बिलांची आकारणी व नियमबाह्य कारभार असल्याचे उघडकीस आले. हा अहवाल महापालिका आयुक्त प्रशांत रोडे यांना शनिवारी सादर करण्यात येऊन कारवाईची शिफारस करण्यात आल्याने आयुक्त कोणती कारवाई करतात, याकडे जिल्ह्याचे लक्ष लागले आहे.

बॉक्स

हिलटॉप हॉस्पिटल

शासन दरपत्रकाप्रमाणे सिझेरीयन सेक्शन या शस्त्रक्रियेसाठी ५३ हजार प्रतिशस्त्रक्रिया व उपचारासाठी एकरकमी दर निर्धारित केलेले आहे. मात्र, देयक क्र, १४ मध्ये ८६,६०० प्रतिदिवस ४ हजारांऐवजी ६ दिवसांसाठी २४ हजारांची आकारणी करण्यात आली व दर्शनी भागात शासकीय दरपत्रक लावलेले नाही.

बॉक्स

अंबादेवी कोविड हॉस्पिटल

पीपीई कीट व औषधांचे खोके जाळून नष्ट करतानाचे दिसून आले. याशिवाय बिलिंग सेक्शन हा उपचार करण्यात येत असलेल्या वार्डातच कार्यन्वित असल्याचे पथकाला दिसून आले व रुग्णांचे नातेवाईक यांना जनरल वार्डात पाणी व इतर साहित्य देण्यासाठी थेट प्रवेश असल्याचे आढळले.

बॉक्स

रेनबो हॉस्पिटल

पीपीई कीट दराचा उल्लेख नसलेले जुने जोडपत्र लावलेले पथकाला दिसून आले. रुग्णांकडून ईसीजी, इन्फूजन, इट्युबेशनकरिता अतिरिक्त दराची आकारणी, काही रुग्णांना आयसीमधून प्रकृती ठिक झाल्यावर आयसोलेशन वाॅर्डात दाखल केल्यानंतरही त्या दिवसांचे सरसकट आयसीयूची आकारणी करण्यात आली.

बॉक्स

सिटी मल्टिस्पेशािलिटी हॉस्पिटल

वारंवार मागणी करूनही पथकाला बिलबुक दिले नाही. तासाभरानंतर एक बिलबुक दिले. त्यातील २२ पावत्या काढून पुरावा नष्ट केल्याचे पथकाच्या निदर्शनास आले. सायंकाळी पथक सदस्यांच्या भ्रमनध्वनीवर कॉल करून सर्व देयकांच्या प्रिंटआऊट तयार असल्याचे सांगण्यात आल्याचे पथकाच्या अहवालात नमूद आहे.