गौरखेडा येथे उपसरपंचाला मारहाण

कळाशी येथे मोबाईल पळविला

कळाशी : येथील गौरव मोहन गावंडे (२७) याचा नऊ हजारांचा मोबाईल त्याच्या घरातून लंपास झाला. चुलतभाऊ मनोज अंबादास गावंडे यांनी व्यक्त केलेल्या संशयावरून गावातील राजेश गजानन राणे याच्याविरुद्ध दर्यापूर पोलिसांत याप्रकरणी तक्रार देण्यात आली. पोलिसांनी १ जून रोजी कलम ३८० अन्वये गुन्हा नोंदविला.

------------

तोंडगाव येथे घरफोडी

परतवाडा : अचलपूर तालुक्यातील तोंडगाव येथे शेख सत्तार गफ्फार (३०) यांच्या घराच्या भिंतीला छिद्र पाडून चोरट्याने १५ हजार रोख तसेच दागिने असा २७ हजारांचा मुद्देमाल लंपास केला. ते २४ ते ३१ मे दरम्यान बाहेरगाव होते. याप्रकरणी परतवाडा पोलिसांनी अज्ञात चोरट्याविरुद्ध भादंविचे कलम ४५४, ४६७, ३८० अन्वये गुन्हा नोंदविला.

-------------

पैसे न दिल्याने पित्याला मारहाण

बेलोरा : चांदूर बाजार तालुक्यातील प्रल्हादपूर येथील श्रीकृष्णनगर येथे राहुल विधाते (३८) याने पैसे देण्यास नकार देणाऱ्या पित्याला थापड-बुक्क्यांनी मारून भिंतीवर ढकलले. यात गणेश दौलतराव विधाते (७१) हे सेवानिवृत्त शिक्षक असलेले त्याचे वडील जखमी झाले. चांदूर बाजार पोलिसांनी भादंविचे कलम ३२४, ५०६ अन्वये गुन्हा नोंदविला.

--------------

नांदुरी येथून मोबाईल पळविला

धारणी : तालुक्यातील नांदुरी येथील अंगणवाडी सेविका (४९) यांनी घरात खिडकीजवळ चार्जिंगसाठी लावलेला मोबाईल अज्ञात व्यक्तीने पळविला. ३० मेच्या रात्री ही घटना घडली. धारणी पोलिसांनी भादंविचे कलम ३८० अन्वये गुन्हा नोंदविला.

---------------

एकीचा गर्भपात, दुसरीशी लग्न

चिखलदरा : लग्नाचे आमिष देऊन सहा वर्षांपासून शारीरिक संबंध प्रस्थापित करणाऱ्या कमलेश गुलाब राऊत (रा. तेलखार) याने २५ वर्षीय युवतीचा गर्भपात केल्यानंतर तिला टाळाटाळ केली व अन्य युवतीशी लग्न केले. याप्रकरणी चिखलदरा पोलिसांनी १ जून रोजी भादंविचे कलम ३७८ (२) (एन) तसेच अनुसूचित जाती-जमाती अत्याचार प्रतिबंधक कायद्यान्वये गुन्हा नोंदविला.

---------------

अज्ञात वाहनाची धडक, युवक जखमी

दर्यापूर : खोलापूर पोलीस ठाण्याच्या हद्दीतील बेंबळा खुर्द येथे राहणारे बाळू एकनाथ इंगोले (६०) यांच्या एमएच २७ टी ८०९१ क्रमांकाच्या दुचाकीला अज्ञात वाहनाने जोरदार धडक दिली. ३ मे रोजी ही घटना घडली होती. याप्रकरणी १ जून रोजी दाखल तक्रारीवरून पोलिसांनी भादंविचे कलम २७९, ३३७, ३३८ अन्वये गुन्हा नोंदविला.

--------------

हिंगणी येथे अवैध रेतीची वाहतूक

दर्यापूर : तालुक्यातील हिंगणी येथील नदी-नाल्यांतून एक ब्रास रेती अवैधरीत्या वाहून नेणारा ट्रॅक्टर आढळून आला. याप्रकरणी दर्यापूर पोलिसांनी रणजित महेंद्र चोरपगार (३३) याच्याविरुद्ध भादंविचे कलम ३७९ अन्वये गुन्हा दाखल केला.

-----------------

हिरपूर येथे विवाहितेच्या आत्महत्याप्रकरणी गुन्हा

तळेगाव दशासर : नजीकच्या हिरपूर येथे ३० मे २०२१ रोजी सासरच्या मंडळीकडून होणाऱ्या शारीरिक व मानसिक छळाला कंटाळून विवाहितेने आत्महत्या केली होती. याप्रकरणी ४० वर्षीय महिलेच्या तक्रारीवरून रोशन शंकर ठाकरे व दोन महिलांविरुद्ध भादंविचे कलम ३०६, ४९८ अ, ३४ अन्वये तळेगाव दशासर पोलिसांनी गुन्हा नोंदविला.

--------------

खेड येथे आईला काठीने मारहाण

मोर्शी : ६० वर्षीय वृद्ध आईला घराबाहेर काढून त्यावर ताबा करण्याच्या उद्देशाने तिला शिवीगाळ, मारहाण होत असल्याची तक्रार मोर्शी पोलिसांत १ जून रोजी दाखल झाली. मंगेश रामभाऊ कवरे (४०) याने त्याच्या आईला इंधनाच्या लाकडाने डोक्यावर मारले. मोर्शी पोलिसांनी भादंविचे कलम ३२४, ५०४, ५०६ अन्वये गुन्हा नोंदविला.

-----------------