जुना धामणगाव येथील शेतमजुराचा संशयास्पद मृत्यू

तालुक्यातील जुना धामणगाव येथे राहणाऱ्या भास्कर वामनराव विंचुरकर (५५) हे खुशाल तेलमल लाहोटी ज्यांच्या शेतावर शेतमजुरीचे काम करीत होते. शेतावर काम करीत असताना त्यांचा वडिलांचा संशयास्पद मृत्यू झाल्याची तक्रार दत्तापूर पोलिसांत करण्यात आली. या प्रकरणात भास्करच्या मुलाच्या तक्रारीनुसार, २९ जून रोजी शेतातील गोठ्यावर काम करताना वडील भास्कर विंचूरकर यांना येथील चारा कटर मशीनचा करंट लागल्याने त्यांचा मृत्यू झाला. उपस्थितांनी त्यांना शहरातील खासगी रुग्णालयात उपचारार्थ नेले असता, डॉक्टरांनी अपघाती मृत्यू समजून दाखल करण्यास नकार दिला. त्यामुळे त्यांना ग्रामीण रुग्णालयात दाखल करण्यात आले. अंत्यसंस्कारादरम्यान कुटुंबीयांना त्यांच्या डाव्या हाताच्या खांद्याला करंट लागल्याच्या जखमा दिसून आल्याने त्यांच्या दोन्ही मुलांनी शेतमालकास विचारणा केली असता, तुमचे वडील भोवळ येऊन पडले, त्याचीच जखम असल्याचे सांगण्यात आल्याचे तक्रारीत नमूद आहे.

कोट

माझ्या शेतामध्ये काम करीत असताना भास्कर विंचुरकर यांचा मृत्यू झाला. ही माहिती मला मिळाली होती. मी त्यादिवशी घटनास्थळी हजर नव्हतो.

- खुशाल लाहोटी,

शेतमालक

-----------------------------------------------

फिर्यादीच्या तक्रारीवरून प्रकरणातील तपास चौकशीत ठेवला आहे. चौकशीअंती पुढील कारवाई करू.

- ब्रह्मदेव शेळके,

ठाणेदार दत्तापूर