मुलगी परतली, अपहरणकर्त्याला संपविले कुणी?

लोकमत न्यूज नेटवर्क
चांदूर रेल्वे : शहरातील गारुडीपुऱ्यातून अपहरण केलेली अल्पवयीन मुलगी अपहरणकर्त्याने गुरुवारी रात्री परत आणून सोडली आणि काही वेळातच त्याचा रक्ताच्या थारोळ्यातील मृतदेह याच परिसरात आढळून आला. या मुलीच्या सुटकेसाठी दोन दिवसांपासून ठाण्यावर जमाव जात होता. यामुळे खुनासह १२ गुन्हे दाखल असलेल्या या गुंडाला कुणी संपविले, जमावाने की यामागे गुन्हेगारी विश्वातील पूर्ववैमनस्य कारणीभूत आहे, दरम्यान, पोलिसांनी चार जणांना ताब्यात घेतले असून कबुलीजबाब सुरू असल्याचे रात्री ८ च्या सुमारास सांगितले. 
नईम खान रहमान खान (३५, रा. एस.टी. डेपोच्या मागे) असे मृताचे नाव आहे. त्याच्या शरीरावर चाकूचे असंख्य वार असल्याचे पोलीस पंचनाम्यात पुढे आले आहे. बुधवारी दुपारी त्याच्यासह शेख अशफाक, अतुल कुसराम व चांदूरवाडी येथील एक आरोपी गारुडीपुऱ्यात शिरले. नागरिकांना या चौकडीने चाकूचा धाक दाखवीत गप्प केले व मुलीला जबरीने विना क्रमांकाच्या वाहनात बसवून पलायन केले होते. 

चांदूर रेल्वेत रात्री दीडच्या सुमारास थरार; दोन दिवसांपासून ठाण्यावर जमाव 

लोकमत न्यूज नेटवर्क
चांदूर रेल्वे : आरोपींच्या अटकेच्या व मुलीच्या सुटकेच्या मागणीसाठी त्यांनी पोलीस ठाण्यालाच घेराव केला होता. ठाणेदार विलास कुळकर्णी यांच्या नेतृत्वात तातडीने दोन पथके आरोपींच्या अटकेसाठी रवाना करण्यात आली होती.
दरम्यान, शुक्रवारी सकाळी पोलिसांनी एका आरोपीला अटक केली. तथापि, त्याबाबत कमालीची गुप्तता पाळण्यात आली. दुसरीकडे २४ तास होत असतानाही मुलीचा पत्ता लागलेला नसल्याने गारुडीपुऱ्यातील नागरिकांनी पुन्हा पोलीस ठाणे गाठले व सुमारे दोन तास ठिय्या दिला. नारेबाजी केली. पोलिसांनी आश्वासन देऊन त्यांना परत पाठविले. नागरिकांचा रोष पाहता अमरावती येथून आरसीपी पथक, तसेच कुऱ्हा व तळेगाव दशासर पोलिसांची कुमक तैनात करण्यात आली. दरम्यान, गुरुवारी मध्यरात्री नईम खान हा अपहृत मुलीला घेऊन गारुडीपुऱ्यात आला. त्याने तेथून काढता पाय घेताच तासा दिडतासाने काही अंतरावर त्याचा मृतदेह रक्ताच्या थारोळ्यात दीडच्या सुमारास आढळून आला. त्याच्या शरीरावर चाकूने भोसकल्याचे असंख्य वार होते. 
घटनेची माहिती मिळताच ठाणेदारांच्या मार्गदर्शनात पोलिसांनी पंचनामा केला. या प्रकरणी शुक्रवारी रात्री चौघांना  अटक केल्यानंतर त्यांच्याविरूध्द खुनाचा गुन्हा दाखल करण्यात आला. शनिवारी त्यांना न्यायालयासमोर हजर करण्यात येणार आहे. 

चौघे ताब्यात 
काही जणांसमवेत मुलीला घेऊन आलेल्या नईमने शिवीगाळ करीत दहशत पसरविण्याचा प्रयत्न केल्याचे सांगितले जाते. दरम्यान, त्याच्या खूनप्रकरणी दीपक रतन पवार (२८), साजिद उमर ऊर्फ पप्पू आरिफ शेख (४१), अमजद खान युसूफ खान (२७) व मोहम्मद हाफिज मोहमद कादर (४२) यांना पोलिसांनी ताब्यात घेतले. त्यांचा कबुलीजबाब नोंदविला जात असल्याचे पीआय कुळकर्णी म्हणाले.

चोख बंदोबस्त 
चांदूर रेल्वे शहरातील पोलिसांनी नईमचा मृतदेह ग्रामीण रुग्णालयामध्ये शवविच्छेदन झाल्यानंतर कुटुंबाच्या स्वाधीन केला. शुक्रवारी दुपारी त्याच्यावर अंत्यसंस्कार करण्यात आले. पोलीस उपअधीक्षक शशिकांत सातव, उपविभागीय पोलीस अधिकारी शशिकांत जगदाळे यांनी दिवसभर घटनेचा आढावा घेतला. पोलीस निरीक्षक विलास कुलकर्णी, सहायक पोलीस निरीक्षक मनोज सुरवाडे, गीता तागडे, जमादार शिवाजी घुगे, मनोज मेश्राम, दिनेश राठोड, योगेश कडू यांनी चोख बंदोबस्त ठेवून कुठलाही शहरात अनुचित प्रकार घडू दिला नाही. 

अनेक गुन्हे शिरावर : मृत नईमच्या शिरावर खुनासह खुनाचा प्रयत्न, अपहरण, धाकदपटशा अशा प्रकारे १२ गुन्हे आहेत. संघटित गुन्हेगारीमुळे पोलीस दप्तरी कुख्यात गुंड असा त्याचा लौकिक होता. त्याला काही काळासाठी तडीपार करण्यात आले होते. 

चांदूर रेल्वे येथे २२ सप्टेंबरच्या मध्यरात्री अपहृत मुलीला घरी रात्री सोडण्यासाठी आरोपीचा अज्ञात हल्लेखोरांनी खून केला. याप्रकरणी खुनाचा गुन्हा नोंदविण्यात आला आहे. 
-  विलास कुलकर्णी, पोलीस निरीक्षक, चांदूर रेल्वे