अखेर पोलीस अधिकाऱ्यांच्या बहुप्रतिक्षित बदल्यांची यादी झळकली

निलिमा आरज पदस्थापनेच्या प्रतिक्षेत : रिता ऊईके ग्रामीणमधून शहरात

अमरावती : बहुप्रतीक्षेत पोलीस निरिक्षक, सहायक निरिक्षक व उपनिरिक्षकांच्या सर्वसाधारण बदल्यांची यादी ९ डिसेंबर रोजी दुपारी जाहीर झाली. या बदली यादीमध्ये कोतवालीच्या ठाणेदार निलिमा आरज यांची बदली झाली असून, रिता ऊईके या ग्रामीणमधून शहर आयुक्तालयात येणार आहेत.

शहर पोलिस आयुक्तालयातून वरिष्ठ पोलिस निरीक्षक निलिमा आरज यांची बदली झाली. आरज या सहायक पोलिस आयुक्त वा पोलिस उपअधीक्षक म्हणून पदोन्नतीस पात्र आहेत. त्यामुळे त्यांची बदली झाली असली तरी त्यांना पदस्थापनेच्या प्रतीक्षेत ठेवण्यात आले आहे. अमरावती ग्रामीणला पोलीस निरिक्षक असलेल्या रिता उईके यांची अमरावती शहर आयुक्तालयात, जळगाव येथे कार्यरत असलेले पोलीस निरिक्षक अवतारसिंग चव्हाण आणि नांदेड येथून पोलीस निरिक्षक अशोक जाधव यांची अमरावती ग्रामीणमध्ये बदली झाली आहे.

सहायक पोलीस निरिक्षक असलेले अरुण राऊत यांची एटीएस, अमुल बच्छाव यांची मुंबई शहर, सचिन इंगळे आणि हेमंत चौधरी यांची नागपूर शहर येथे बदली झाली आहे. तसेच अमरावती पोलिस आयुक्तालयातील सहायक पोलीस निरिक्षक प्रशाली काळे यांची नागपूर शहर, दत्ता देसाई यांची लोहमार्ग पुणे, कविता पाटील यांची मुंबई शहर, राहुल जाधव यांची अमरावती परिक्षेत्राला बदली झाली आहे. याचवेळी वर्धा येथून सहायक पोलीस निरिक्षक मेघाली गावंडे, महेन्द्र इंगळे आणि एसआयडीमधून सहायक पोलीस निरिक्षक वैशाली चव्हाण या तीन अधिकाऱ्यांची अमरावती आयुक्तालयात बदली झाली आहे.

तसेच अमरावती शहर आयुक्तालयातून पीएसआय पंकज ढोके यांची नांदेड परिक्षेत्र, पीएसआय गणेश अहीरे यांची नाशिक परिक्षेत्र, पीएसआय अयुब शेख यांची नांदेड परिक्षेत्र, पीएसआय राजकिरण येवले यांची अमरावती परिक्षेत्रामध्ये बदली झाली आहे. याचवेळी अमरावती ग्रामिणमधील पीएसआय गणेश मुराडे यांची नांदेड परिक्षेत्र, पीएसआय मंजुषा ढोले यांची अमरावती आयुक्तालयात, नागपूर शहरातून पीएसआय तुळशिराम ढाकुलकर व पीएसआय मनिष गोडबोले यांची अमरावती शहर आयुक्तालयात बदली झाली आहे.