अमरावती नागपूर हायवेवर कारचा भीषण अपघात, तिघे ठार

एकाचा मृतदेह झाडावर, दुसरा गाडीत, तर तिसरा नालीत

तिवसा : वर्धा जिल्ह्यातील चिस्तूर या गावाजवळ अमरावतीहून नागपूरकडे जात असलेल्या एका कारचे नियंत्रण सुटल्याने अमरावती - नागपूर राष्ट्रीय महामार्ग क्रमांक ६ वरील नदीच्या दरीत कार कोसळून चालकासह तिघे जण ठार झाले. ही घटना सकाळी ७ वाजण्याच्या सुमारास तळेगांव श्यामजीपंतच्या चिस्तूर गावाजवळ घडली.

एका MH 30 P 3214 क्रमांकाच्या चारचाकी वाहनाला भीषण अपघात झाला. ज्यामध्ये तिघे जागीच ठार झाले, तर एक जण आश्चर्यकारक वाचला आहे. मृतांमध्ये अमित गोयते (वय ३२ वर्षे, रा. बडनेरा), शुभम गारोडे (वय २५ वर्षे, रा. अमरावती), आशिष माटे (रा. राजुरा, जि. अमरावती) हे तिघे जागीच ठार झाले, तर शुभम भोयर हा सुखरूप वाचला आहे. हा अपघात इतका भीषण होता, की कारचा अक्षरशः चुराडा झाला आहे. यातील एकाचा मृतदेह झाडावर अडकला होता, दुसरा गाडीत अडकला होता, तर तिसरा मृतदेह बाजूला पडून होता. पोलिसांच्या प्राथमिक अंदाजानुसार वाहनावरील ताबा सुटल्याने हा अपघात झाला असावा, असे सांगण्यात आले. कारण मोठे पळसाचे झाड तोडून ही गाडी उडून बाजुला फेकली असावी, असा अंदाज वर्तविण्यात आला आहे. घटनास्थळी पोलीस उपनिरीक्षक पवन भांबुरकर, जमादार राजेश साहू, सुधीर डांगे, श्याम गहाट, राहुल अमोने, अनिल चिलघर, देवेंद्र गुजर, विजय उईके, रमेश परबत यांनी मोठी कसरत करून मृतदेह उत्तरीय तपासणीसाठी पाठवले.