वादळी पावसाचा तडाखा

सोसाट्याचा वारा, आसमंतात धुळीचे लोट, आकाशात ढगांची गर्दी आणि काही कळण्याच्या आतच बरसू लागलेला पाऊस.

शहरातील वीज गूल : झाडे उन्मळली, होर्डिंग्ज उडाले, वाहनांची हानी
अमरावती : सोसाट्याचा वारा, आसमंतात धुळीचे लोट, आकाशात ढगांची गर्दी आणि काही कळण्याच्या आतच बरसू लागलेला पाऊस. रविवारी सायंकाळी ५.३० वाजताच्या सुमारास अवघ्या १५ मिनिटे कोसळलेल्या पावसाने शहरात शेकडो झाडे उन्मळून पडली. होर्डिंग्ज-बॅनर उडाले, झाडांखाली वाहने दबली. मान्सूनपूर्व पावसाचा चांगलाच तडाखा रविवारी शहराला बसला.
अवघ्या १५ मिनिटांच्या चक्रीवादळानंतर शहरातील बहुतांश भागातील वीज गूल झाली होती. या प्रकारानंतर महापालिकेतील आपत्कालीन यंत्रणा सक्रिय झाली आहे. शहरातील मोहननगर, अप्पर वर्धा वसाहत, पंचायत राज प्रशिक्षण केंद्र, श्रीकृष्णपेठ, रविनगर, राधानगर, पार्वतीनगर, महालक्ष्मीनगर, शंकरनगर, नवाथेनगर ते गोेपालनगर मार्गावर अनेक झाडे उन्मळून पडली होती. रस्त्यातील खांबावर लावलेले होर्डिंग्ज आणि बॅनरदेखील उडालेत.

शहरात १५ मिनिटे वादळाचे धूमशान
अमरावती : अनेक कच्च्या घरांवरील टिनपत्री उडाली. फक्त १५ मिनिटेच पाऊस आणि वादळाचा हा धुमाकूळ सुरू होता.
गर्ल्स हायस्कूलच्या आवारातील पुरातन वृक्ष देखील या सोसाट्याच्या वाऱ्यामुळे उन्मळून पडला. तसेच तेथील चौकातील भव्यदिव्य बॅनर फाटले. राधा नगरातील एका स्कुलच्या आवारात शाळकरी व्हॅनवर वृक्ष कोसळले. त्यामध्ये व्हॅनचे नुकसान झाले. बाबा रेस्टारंटजवळील लोखंडी फ्लॅक्स कोसळले, त्यापुढे भातकुली पंचायत समितीच्या कुंपण भिंतीला लागून असलेला विशाल वृक्ष देखील कोसळला. हे झाड रस्त्याच्या मधोमध पडल्याने वाहतूक बाधित झाली होती. विद्युत भवन आणि सार्वजनिक बांधकाम विभागाच्या समोरही निमवृक्ष कोसळले. शिवाजी विज्ञान महाविद्यालयाच्या परिसरातील वृक्ष देखील मार्गात आडवा पडला. पोलीस मुख्यालयाच्या मैदानाच्या शेजारचा पोलीस आयुक्तालयाकडे जाणारा मार्गदेखील झाडे उन्मळून पडल्याने अवरूध्द झाला होता. तेथीलच सहायक पोलीस आयुक्त कार्यालयाचे टिने उडाली आहे. वादळामुळे विद्युत तारा तुटल्याने शहरातील अनेक भागातील वीज पुरवठा खंडित झाला होता. वलगाव मार्गावरील शादी हॉलचे छप्पर वादळामुळे उडाले. त्याखाली एक चारचाकी वाहन व आॅटोेरिक्षा दबली होती. याखेरीज राधानगर भागामध्ये एका झाडाखील कार दबली होती. हाजरा नगरातील एमएसईबीची डीबी जमिनदोस्त झाली. चक्रीवादळामुळे उपोषण मंडळ उडाले.त्यामुळे उपोषण कर्त्यांची तारांबळ उडाली
आणखी तीन दिवस वादळी पाऊस
मागील चार दिवसांत तापमानात वाढ झाल्याने कमी दाबाची स्थिती निर्माण झाली आहे. या परिसिथतीमुळे वादळी पावसाचा फटका जिल्ह्याला बसल्याचा अंदाज हवामानतज्ज्ञ अनिल बंड यांनी दिला. आणखी तीन दिवस हिच स्थिती राहणार असून तापमान वाढीसोबत वादळी पावसाचा फटका सोसावा लागू शकतो. त्यामुळे सतर्क राहणे गरजेचे आहे. महाराष्ट्रावर हवेचा दाब मध्यम आहे. या परिस्थितीत मान्सून पुढे सरकण्यास अनुकूल आसून सध्या मान्सून श्रीलंकेचज्या दक्षिण किनाऱ्यावर पोहोचला आहे. ७ जून पर्यंत तो केरळ किनारपट्टी आणि १४ किंवा १५ जूनपर्यंत विदर्भात पोहोचणे अपेक्षित आहे. सध्या केरळवर मान्सूनच्या ढगांची गर्दी असून चक्राकार वारे आहेत.

आपातकालीन यंत्रणा सक्रिय
महापालिकेची आपातकालीन यंत्रणा वादळाने सक्रिय झाली आहे. सायंकाळी अग्निशमन विभागाच्या कर्मचाऱ्यांची धावपळ सुरु झाली होती. वादळी वाऱ्यासह आलेल्या पावसामुळे शहरातील शेकडो वृक्ष कोसळलीत, त्यासाठी अग्निशमन विभागाने चार पथके तयार केली. उद्यान अधिक्षक प्रमोद येवतीकर व अग्निशमन अधिक्षक भरतसिंग चव्हाण यांच्या नेत्तृत्वात २० ते २५ कर्मचाऱ्यांनी विविध ठिकाणी धाव घेऊन मदतीचे कार्य सुरु केले. बडनेरा उपनगरालाही वादळी पावसाचा तडाखा बसला. काही वेळासाठी येथील जनजीवन विस्कळीत झाले होते. काही ठिकाणी झाडे उन्मळून पडली तर होर्डिंग्ज आणि बॅनर उडाले. काही घरांवरील टिनपत्रे देखील उडाली. झाडे रस्त्यावर पडल्याने वाहतुकीला अडथळा निर्माण झाला.

विद्युत प्रवाहाच्या झटक्याने युवकाचा मृत्यू
बडनेरा : वादळी वाऱ्यासह आलेल्या पावसाने उडालेली टिने पुन्हा घरावर लावत असताना विद्युत प्रवाहाच्या झटक्याने एका युवकाचा मृत्यू झाला. ही घटना रविवारी सायंकाळी ७.३० वाजताच्या सुमारास बडनेरा जुनी वस्तीतील पवारवाडीत घडली. आकाश रामेश्वर खडेकर (२०) असे मृताचे नाव आहे. आकाशने उडालेली टिनपत्रे गोळा करून पुन्हा लावण्याचे प्रयत्न सुरू केले. मात्र, दरम्यान वीजपुरवठा अचानक सुरू झाल्याने त्याला विद्युत प्रवाहाचा जोरदार झटका बसला.