टिप्पर-दुचाकीमध्ये अपघात; एक ठार, एक गंभीर

टिप्पर- दुचाकीमध्ये झालेल्या भीषण अपघातात टीप्पर पलटला. दुचाकीस्वार टीप्परखाली दबल्याने त्याचा घटनास्थळीच मृत्यु झाला.

अमरावती : टिप्पर- दुचाकीमध्ये झालेल्या भीषण अपघातात टीप्पर पलटला. दुचाकीस्वार टीप्परखाली दबल्याने त्याचा घटनास्थळीच मृत्यु झाला. फ्रेजरपुरा पोलीस ठाण्यांतर्गत मार्डी मार्गावर शुक्रवारी दुपारी ४ वाजता ही घटना घडली. प्रमोद रमेश कडू (२५) असे मृताचे नाव आहे. अपघातात प्रमोदचा साथीदार निलेश बाबाराव राऊत (३०) हा गंभीर जखमी झाला.
आर्वी यथील सर्कसपूरचे रहिवासी प्रमोद कडू व निलेश राऊत हे दोघे शुक्रवारी त्यांच्या एमएच २२/जे ८९६९ क्रमांकाच्या दुचाकीने अमरावती येथून आर्वीकडे जात होते.
टिप्पर क्रमांक सीजी १२/०७२६ क्रमांकाचा चालक मुरूम घेवून आर्वी येथून भरधाव वेगात अमरावतीकडे येत होता. दरम्यान टीप्पर चालकाचे मार्डी मार्गावर नियंत्रण सुटल्याने त्याने विरूध्द दिशेने येणाऱ्या प्रमोदच्या दुचाकीला जोरदार धडक दिली. ही धडक एवढी भिषण होती की , यामध्ये टिप्पर पलटला. त्याखाली प्रमोद कडू दबल्याने त्याचा घटनास्थळीच मृत्यू झाला. अपघातात निलेश गंभीर जखमी झाला. हा अपघात पाहण्यासाठी घटनास्थळी बघ्यांची गर्दी उसळल्याने अमरावती-मार्डी मार्गावरील वाहतूक काही वेळ ठप्प झाली होती.
घटनेची माहिती फे्रजरपुरा पोलिसांना मिळताच पोलीस निरीक्षक रियाजोद्दीन देशमुख कर्मचाऱ्यांसह घटनास्थळी दाखल झाले. पोलिसांनी जखमीला उपचारासाठी जिल्हा सामान्य रूग्णालयात दाखल करून तेथील वाहतूक सुरळीत केली.