आज शाळेची पहिली घंटा वाजणार

उन्हाळी सुटीनंतर सोमवार २६ जून रोजी शाळांची घंटा वाजणार आहे. शहरासह जिल्हयातील सर्व शाळांमध्ये मंगळवारी प्रवेशोत्सव साजरा केला जाणार आहे.

लोकमत न्यूज नेटवर्क
अमरावती : उन्हाळी सुटीनंतर सोमवार २६ जून रोजी शाळांची घंटा वाजणार आहे. शहरासह जिल्हयातील सर्व शाळांमध्ये मंगळवारी प्रवेशोत्सव साजरा केला जाणार आहे.
अतिशय उत्साहवर्धक वातावरणात जिल्हा परिषदेच्या शाळेत नव्याने प्रवेश घेतलेल्या विद्यार्थ्यांचे रोपटे देऊन स्वागत केले जाणार आहे. त्यामुळे शाळेचा पहिला दिवस हा विद्यार्थ्यांसाठी अविस्मरणीय असाच असेल. नवप्रवेशित बालकांना शाळेची गोडी लागावी , या उद्देशाने शाळा प्रवेशोत्सव साजरा करण्याचे आदेश शिक्षण विभागाने दिले आहेत. त्या अनुषंगाने नियोजन करण्यात आले असून दोन दिवसांपासून सर्व माध्यमांच्या शाळांचे शिक्षक व अधिकाऱ्यांनी तयारी सुरू केली आहे. शाळेचा पहिला दिवस गोड करण्याकरिता विशेष प्रयत्न करण्यात येत आहेत. शाळेच्या पहिल्या दिवशी शाळांना भेटी देण्यासाठी अधिकाºयांची भरारी पथके कार्यरत राहणार असून तालुकास्तरावर स्वतंत्र पथके गठित करण्यात आली आहेत. मोफत व सक्तीचे शिक्षण हक्क कायद्यानुसार एकही बालक शिक्षणापासून वंचित राहणार नाहीत, याकरिता विशेष प्रयत्न करण्यात येत आहेत. त्याचाच एक भाग म्हणून शाळेचा पहिला दिवस बालकांच्या स्मरणात राहावा व नवप्रवेशित बालकांमध्ये नवप्रेरणा जागृत व्हावी, या उद्देशाने शाळा प्रवेशोत्सव साजरा करण्यात येणार आहे. शाळेच्या पहिल्या दिवशी नवप्रवेशित इयत्ता पहिली व चौथीच्या बालकांना गोड पदार्थ भरवून त्यांचे स्वागत करण्यात येणार आहे. स्थानिक स्वराज्य संस्थांसह प्राथमिक शाळांतील बालकांना पाठ्यपुस्तकांचे मोफत वाटप करण्यात येणार आहे.
पाठयपुस्तकांचा पुरवठा
सर्व शिक्षा अभियानाअंतर्गत इयत्ता १ ते ८ वीच्या विद्यार्थ्यांना शाळेच्या पहिल्या दिवशी मोफत पाठ्यपुस्तके देण्यात येणार आहेत.

शाळेचा पहिला दिवस संस्मरणिय राहावा, या उद्देशाने विशेष तयारी करण्यात आली आहे. शाळेच्या पहिल्या दिवशीच खेळीमेळीच्या वातावरणात विद्यार्थ्यांचे स्वागत केले जाणार आहे. यासाठी पुर्व तयारी पूर्ण करण्यात आली आहे.
- जयश्री राऊत शिक्षणाधिकारी,प्राथमिक