ना ओटीपी दिला ना स्कॅन केले; तरीही गमावले ५.७४ लाख

डागा सफायरमधील व्यावसायिकाला गंडविले

अमरावती : मोबाइलवर आलेला ओटीपी सांगितला, क्यूआर कोडस्कॅन केला, अन बॅंक खात्यातील पैसे परस्पर उडाले, अशा फसवणुकीच्या घटना नवीन नाहीत. मात्र, येथील एका व्यावसायिकाच्या खात्यातून तब्बल ५ लाख ७४ हजार रुपये परस्पर डेबिट झाले. ना त्यांनी कुणाला ओटीपी पाठविला, ना कुठला क्यूआर कोड स्कॅन केला. २३ नोव्हेंबर २०२२ रोजी घडलेल्या या ऑनलाइन फसवणूकप्रकरणी सायबर पोलिसांनी दोन महिन्यांनंतर २८ जानेवारी रोजी गुन्ह्याची नोंद केली.

येथील जोशी कॉलनीस्थित डागा सफायरमध्ये राहणाऱ्या एका ५५ वर्षीय व्यावसायिकाची तीन बॅंकांमध्ये खाती आहेत. दरम्यान, २३ नोव्हेंबर रोजी सकाळी ६ च्या सुमारास झोपेतून उठल्याबरोबर त्यांना मोबाइलवर बॅंकेकडून आलेले संदेश दिसले. तीनही बॅंक खात्यातून ५ लाख ७४ हजार रुपये अनोळखी खात्यात ट्रान्सफर झाल्याचे ते संदेश पाहून ते नखशिखांत हादरले. विशेष म्हणजे त्यांना त्याबाबत कुणाचाही फोनकॉल आला नाही. त्यांनी कुणाला ओटीपी वा अन्य कुठलीही माहिती शेअर केली नाही. तरीदेखील अनोळखी आरोपीने त्यांची आर्थिक फसवणूक केली. याबाबत त्यांनी सायबर पोलिस ठाण्यात धाव घेतली. लेखी तक्रार नोंदविली. सायबर पोलिस ठाण्याने पुरेसी खातरजमा केल्यानंतर २८ जानेवारी रोजी दुपारी दीडच्या सुमारास अनोळखी आरोपीविरूध्द फसवणूक व आयटी ॲक्टअन्वये गुन्हा दाखल केला.

पैसे स्वीकारताना ओटीपी लागत नाही

ओटीपी फक्त पैसे देताना लागतो. पैसे स्वीकार करणाऱ्या माणसाला ओटीपीची गरज पडत नाही. अनेकदा नव्या यूजरला पाठवलेले पैसे स्वीकारण्यासाठी ओटीपी लागतो, असं खोटं सांगूनही ओटीपी उकळला जातो. मात्र, जो यूजर पैसे पाठवणार आहे, फक्त त्याच्याच मोबाइल नंबरवर ओटीपी येतो, हे नेहमी लक्षात ठेवावे.

सायबर करीत आहे सुक्ष्म तपास

पैसे भरताना फक्त अधिकृत ॲप्स किंवा वेबसाइटचाच वापर करावा. वेबसाइट अथवा ॲप अधिकृत नसेल, तर ओटीपी ट्रॅक करून पैशाची चोरी केली जाते. ओटीपीशिवाय यूजरची खासगी माहितीही अशा ॲप्समधून लिक होते. त्यामुळे डागा सफायरमधील त्या व्यावसायिकाची ऑनलाइन फसवणूक होण्यापूर्वी त्यांना काही मॅसेज आले का, त्यांनी कुठल्या लिंकवर क्लिक केले का, या अंगाने तपास केला जात आहे.