भरधाव ट्रकने दुचाकीस्वारास चिरडले

नांदगाव पेठ : राष्ट्रीय महामार्गावरून जाणाऱ्या भरधाव ट्रकने दुचाकीला चिरडले. या अपघातात एक जण जागीच ठार, तर त्याचा मित्र गंभीर जखमी झाल्याची घटना सोमवारी दुपारी ३ वाजताच्या सुमारास रहाटगाव येथील चारचाकी वाहनाच्या शोरूमसमोर घडली.

रुग्णालयातून घरी परतताना दोन मित्रांवर काळाने घाला घातला. मनोज राजाभाऊ ढबाळे, असे मृत तरुणाचे, तर ऋषिकेश दादाराव घाटोळ, असे जखमीचे नाव आहे. दोघेही तिवसा तालुक्यातील वाठोडा खुर्द येथील रहिवासी असल्याची माहिती आहे. मनोज आणि ऋषीकेश हे दोघेही सोमवारी सकाळी एमएच २७ एस ९८५७ या दुचाकीने अमरावती येथील खासगी रुग्णालयात आले होते. रुग्णालयाचे काम झाल्यानंतर ते वाठोडा खुर्द येथे परत जात असताना दुपारी ३ वाजताच्या सुमारास रहाटगाव येथील एका कार शोरूमजवळ ओ.डी.१५ एन ७९५५ या १८ चाकी मालवाहू ट्रकने दुचाकीस धडक दिली. दुचाकीसह मनोज ट्रकच्या मागील चाकात आल्याने त्याचा चेहरा चेंदामेंदा झाला. तो जागीच ठार झाला. मागे बसलेला ऋषिकेश गंभीररीत्या जखमी झाला. घटना घडताच घटनास्थळी बघ्यांची एकच गर्दी झाली. नांदगाव पेठचे ठाणेदार अनिल कुरळकर यांचेसह पोलीस कर्मचारी घटनास्थळी पोहचले. जखमी ऋषीकेशला तातडीने जिल्हा सामान्य रुग्णालयात दाखल केले. घटनेची माहिती मिळताच मनोजच्या कुटुंबीयांनी एकच आक्रोश केला. नांदगाव पेठ पोलिसांनी पंचनामा केला असून पुढील कार्यवाही सुरू आहे.