म्हशींनी भरलेला भरधाव ट्रक उड्डाणपुलाला धडकला

फोटो पी ०५ नांदगाव

नांदगाव पेठ : छिंदवाडा येथून म्हशी घेऊन अमरावतीकडे भरधाव जाणारा ट्रक उड्डाणपुलाला धडकल्याने झालेल्या जबर अपघातात ८ म्हशी जागीच ठार झाल्या. २५ म्हशी गंभीररीत्या जखमी झाल्या. अपघातानंतर चालक - वाहक घटनास्थळाहून पसार झाले. क्लिनर वाहनात अडकल्याने त्याला पोलिसांनी बाहेर काढून जिल्हा सामान्य रुग्णालयात दाखल केले. शुक्रवारी सकाळी ७ वाजताच्या दरम्यान नांदगाव पेठे पोलीस ठाण्यापासून अगदी हाकेच्या अंतरावर ही घटना घडली.

घटनेची हकीकत अशी की, ट्रक क्र. यूपी १२ बी.टी. २४५१ छिंदवाडा येथून ३३ म्हशी घेऊन अमरावतीकडे जात असताना सकाळी ७ वाजताच्या दरम्यान उड्डाणपुलाखालून अमरावती मार्गावर येण्यासाठी भरधाव निघाला असता उड्डाणपुलाच्या भिंतीला ट्रकची जबर धडक लागली. ट्रक महामार्गाच्या विरुद्ध दिशेने थेट एका हॉटेलनजीक येउन धडकला. या घटनेत ८ म्हशी जागीच ठार झाल्या तर अन्य म्हशी जखमी झाल्याने त्यांना नजीकच्या गोरक्षण येथे उपचारासाठी दाखल करण्यात आले. सादिक नामक क्लिनर हा वाहनात अडकल्याने पोलीस निरीक्षक कुरळकर यांच्या मार्गदर्शनात पोलीस कर्मचार्यांनी सादिकला बाहेर काढून रुग्णवाहिकेच्या मदतीने जिल्हा सामान्य रुग्णालयात दाखल केले. घटनेनंतर या मार्गावरील वाहतूक काही तासासाठी ठप्प झाली होती. क्रेनच्या साहाय्याने दगावलेल्या म्हशींना इतरत्र हलवून त्यांचेवर अंत्यसंस्कार करण्यात आले. नांदगांव पेठ पोलिसांनी घटनेची नोंद घेतली.