दुचाकी अपघातात दोन ठार; पाचशे क्वार्टरजवळची घटना

दुचाकी भरधाव, ट्रिपल सीट

अमरावती : स्थानिक चांदूर रेल्वे रोडवरील एसआरपीएफ कॅम्पनजीकच्या पाचशे क्वार्टर भागातील वळणावर दोन दुचाकींमध्ये भीषण धडक झाली. यामध्ये दोन जणांचा मृत्यू झाला. रविवारी सायंकाळी ७:३० ते ८ च्या सुमारास हा अपघात घडला. फ्रेजरपुरा पोलिस घटनास्थळावर पोहोचले असून, दोघांचेही मृतदेह जिल्हा सामान्य हलविण्यात आले. तेथील डॉक्टरांनी तपासून दोघांनाही मृत घोषित केले.

 फ्रेजरपुरा पोलिसांंनुसार तेजस शरद शेंद्रे (२४, रा. वडगाव माहोरे) व अर्जुन मोहन मोहोकार (१८, परिहारपुरा, वडाळी) अशी मृतांची नावे आहेत. तर यात आकाश दांडेकर व श्रीपाद माहोरे हे दोघे जखमी झाले. त्यांना अमरावती जिल्हा सामान्य रुग्णालयात दाखल करण्यात आले आहे. घटनेची माहिती मिळताच रुग्णांच्या नातेवाइकांनी रुग्णालयात एकच गर्दी केली होती.

फ्रेजरपुऱ्याचे ठाणेदार गोरखनाथ जाधव हे घटनास्थळी पोहोचले होते. भरधाव असलेल्या दोन्ही दुचाकी अगदी वळणावर परस्परांस भिडल्या. त्यामुळे दुचाकीवरील चौघेही दुचाकीसह रस्त्यावर कोसळले. त्यातील तेजस शेंद्रे हा एकटा, तर अर्जुनच्या दुचाकीवर त्याच्यासह आकाश व श्रीपाद हे दोघे असल्याची माहिती प्रत्यक्षदर्शींनी दिली. दुचाकींचादेखील चेंदामेंदा झाला. वृत्त लिहिस्तोवर गुन्हा दाखल करण्याची प्रक्रिया सुरू होती.