उमेश कोल्हे हत्याप्रकरणी आणखी दोघांना एनआयएकडून अटक

चंदा गोळा करणाऱ्याचा समावेश, दुसऱ्याने केली पळण्यास मदत

अमरावती : नुपूर शर्मा यांच्या समर्थनातील पोस्ट फॉरवर्ड करणारे मेडिकल व्यावसायिक उमेश कोल्हे यांच्या हत्येप्रकरणी एनआयएने बुधवारी सकाळी दोन आरोपींना अटक केली. त्यांच्या अटकेमुळे या प्रकरणातील अटकेतील आरोपींची संख्या नऊवर पोहोचली आहे. यातील एकावर कोल्हे यांची हत्या घडवून आणण्यासाठी रक्कम वा वर्गणी गोळा करण्याचा, तर दुसऱ्यावर याआधी अटक सात आरोपींना पळून जाण्यास मदत केल्याचा आरोप आहे. एनआयएच्या पथकाने बुधवारी सकाळी त्यांना त्यांच्या राहत्या घरातून अटक करून शहर कोतवाली पोलीस ठाण्यात आणले.

सूत्रानुसार, मुसीफ अहमद अ. रशीद (४१, रा. ट्रान्सपोर्टनगर, अमरावती) आणि अब्दुल अरबाज अ. सलीम (२३, रा. लालखडी) अशी अटक केलेल्यांची नावे आहेत. एनआयएचे पथक दोन दिवसांपासून शहरात तळ ठोकून आहे. २१ जून रोजी रात्री १०.३०च्या सुमारास प्रभात चौकाकडून श्याम चौकाकडे जाणाऱ्या नूतन कन्याशाळेजवळ मेडिकल व्यावसायिक उमेश कोल्हे यांची गळा चिरून हत्या करण्यात आली होती. त्याप्रकरणी आधी चाकूने हत्या करणाऱ्यांसह पाच आरोपींना अटक करण्यात आली. त्यानंतर पशुचिकित्सक युसूफ खान व मास्टरमाईंड इरफान खान याला अटक केल्यानंतर या प्रकरणाचा धक्कादायक उलगडा करण्यात आला. २ जुलै रोजी पत्रपरिषद घेत पोलिसांनी उमेश कोल्हे यांची हत्या नुपूर शर्मा यांच्या समर्थनार्थ पोस्ट केल्याने झाल्याचे सांगितले. त्यानंतर त्याच दिवशी या प्रकरणाचा तपास अधिकृतपणे एनआयएकडे गेला. शहर कोतवाली पोलिसांच्या ताब्यात असलेल्या त्या सातही आरोपींचा ताबा एनआयएने घेतला. त्यांना एनआयएच्या मुंबईस्थित न्यायालयात हजर करून त्यांची एनआयए कोठडी मागण्यात आली होती.

...असा आहे आरोप

उमेश कोल्हे यांची हत्या झाल्यानंतर व पूर्वीदेखील मुसीफने काही रक्कम गोळा केल्याचा आरोप ठेवण्यात आला आहे, तर अ. अरबाज हा प्रकरणाचा मास्टरमाईंड शेख इरफान याचा निकटवर्तीय असून, त्याचा वाहनचालक आहे. तो अनेकदा इरफानसोबत राहत असल्याचे उघड झाल्याने त्याला अटक करण्यात आली आहे. पूर्वी अटक केलेल्या सात आरोपींच्या तपासातून या दोघांचा सहभाग समोर आला. त्याआधारे ‘एनआयए’च्या पथकाने त्या दोघांचा शोध घेऊन त्यांना मंगळवारी रात्री ताब्यात घेतले, तर त्यांची सखोल विचारपूस करून बुधवारी सकाळी अटक केली.

ट्रान्झिट रिमांड मिळाला

अटक आरोपींना अटकेनंतर २४ तासांच्या आत न्यायालयासमोर हजर करणे आवश्यक आहे. त्यामुळेच ‘एनआयए’च्या पथकाने त्या दोघांनाही बुधवारी दुपारी स्थानिक प्रथमश्रेणी न्यायदंडाधिकारी यांच्या न्यायालयात हजर करून ट्रान्झिट रिमांड मिळण्याबाबत विनंती केली होती. त्यावेळी स्थानिक न्यायालयाने ही विनंती मान्य करुन ७ ऑगस्टपूर्वी दोघांनाही मुंबईच्या ‘एनआयए’ न्यायालयात हजर करण्याबाबत परवानगी दिली.