विनापरवानगी साक्षगंध, कांचन रिसॉर्टवर गुन्हा दाखल

अमरावती : शहरातील नवसारी रिंगरोडवरील कांचन रिसॉर्ट येथे विनापरवानगी साक्षगंधाचा कार्यक्रम आयोजित केल्याचे तहसीलदार पथकाच्या निदर्शनास आल्यावरून गाडगेनगर पोलीस ठाण्यात गुन्हा दाखल करण्यात आला.

कोविड- १९ साथीमुळे जिल्ह्यात संचारबंदी लागू असून, सार्वजनिक समारंभावर मर्यादा घालण्यात आली आहे. त्याचे पालन न केल्यास कारवाईची तरतूदही आदेशात करण्यात आली आहे. साथीचा प्रादुर्भाव वाढू नये, यासाठी हे आदेश निर्गमित करण्यात आले आहेत. त्यामुळे त्याचा भंग होता कामा नये, अन्यथा दंडात्मक कारवाईबरोबरच फौजदारी दाखल करण्याचे आदेश जिल्हाधिकारी शैलेश नवाल यांनी दिले आहेत.

शहरातील कांचन रिसॉर्ट येथे बुधवारी दुपारी १२ च्या सुमारास विनापरवानगी व सुमारे ५० व्यक्तींच्या उपस्थितीत साक्षगंध समारंभ होत असल्याचे तहसीलदार पथकाच्या निदर्शनास आले. त्यानुसार रिसॉर्टचे मालक व वर-वधू यांच्याविरोधात गाडगेनगर पोलीस ठाण्यात गुन्हा दाखल करण्यात आला. तहसीलदार संतोष काकडे यांच्या निर्देशानुसार नवसारी मंडळ अधिकारी बी. जी. गावनेर व तलाठी जितेंद्र लांडगे यांनी तक्रार दिली. त्यानुसार गाडगेनगर पोलिसांनी भारतीय दंड संहितेच्या कलम १८८, २६९, २७०, २७१, २९१, साथ रोग अधिनियमाचे कलम २, ३ व ४, तसेच आपत्ती व्यवस्थापन अधिनियमाचे कलम ५१ (ब) अन्वये गुन्हा दाखल केला.

बॉक्स

होम आयसोलेशन रुग्णाविरुद्ध कारवाई

अंजनगाव सुर्जी नगरपरिषद क्षेत्रात होम आयसोलेशनमदील एक रुग्ण गृह विलगीकरणाच्या काळात रस्त्यावर फिरताना आढळल्याने नगरपरिषदेचे मुख्याधिकारी सुमेध अलोणे यांच्या पथकाने या व्यक्तीविरुद्ध कारवाई केली. त्यांच्या तक्रारीनुसार अंजनगाव सुर्जी पोलीस ठाण्यात गुन्हा दाखल करण्यात आल्याची माहिती तहसीलदार अभिजित जगताप यांनी दिली.