अवकाळीचे नुकसान, २.९१ कोटींचे अनुदान मंजूर

अमरावती : ‘तौक्ते’ चक्रीवादळाच्या प्रभावामुळे हवामानबदल होऊन जिल्ह्यात १६ व १७ मे रोजी वादळी पाऊस झाला. यात काही तालुक्यात घरांच्या पडझडीसह फळपिकांचे नुकसान व गुरे दगावली होती. याकरिता जिल्हाधिकाऱ्यांनी मदतनिधीची मागणी शासनाकडे केली होती. आता बुधवारी एसडीआरएफच्या अनुदानाचा शासनादेश काढण्यात आला. या नुकसानीसाठी जिल्ह्याला वाढीव दराने २ कोटी ९१ लाख २१ हजारांची मदत येत्या आठवड्यात मिळण्याची शक्यता आहे.

यामध्ये ५९६ घरांचे अंशत: नुकसान झाले. याकरिता प्रतिकुटुंब ५ हजार रुपये कपड्यांच्या मदतीसाठी व ५ हजार रुपये घरगुती भांडीकरिता मिळणार आहे. याकरिता ५९.६० लाख मंजूर करण्यात आले. पूर्णत: क्षतीग्रस्त झालेल्या ३३ घरांसाठी २.३० लाख, पूर्णत: पडझड झालेल्या ३३ घरांसाठी ४९.५१ लाखांचे अनुदान मिळणार आहे.

अमरावती तालुक्यात दोन व्यक्तींना दुखापत झाली यात २६ हजार, जिल्ह्यात १९४.७५ हेक्टरचे नुकसान झाले. यात जिरायती क्षेत्रात ११४ शेतकऱ्यांचे ८४.८२ हेक्टरकरिता १३,५०० रुपये, दोन हेक्टरच्या मर्यादेत ११.४६ लाख, बहुवार्षिक पिकांचे १०९ हेक्टरमध्ये २२९ शेतकऱ्यांचे नुकसान झाले. यासाठी १८ हजार रुपये हेक्टरप्रमाणे दोन हेक्टरच्या मर्यादेत १९.७८ लाख व एसडीआरएफचे ३५.१८ लाखांचे अनुदान देण्याची मागणी जिल्हाधिकाऱ्यांनी शासनास केली होती. त्यानुसार आता २.९१ कोटींचे अनुदान मंजूर करण्यात आले.

बॉक्स

३३ निराधार कुटुंबांना १३.३९ लाख

या वादळामुळे वरूड व चांदूर बाजार तालुक्यातील ३३ कुटुंबे निराधार झालीत. या परिवारांना ३३० किलो गहू, ३३० किलो तांदूळ व ९.३४ कोटींचे अनुदान असे एकूण १३.३९ लाखांची मागणी जिल्हाधिकाऱ्यांनी शासनाकडे केली. यानुसार आता मदत देय राहणार आहे. साधारणत: पुढच्या आठवड्यात हा निधी विभागीय आयुक्तांना प्राप्त होईल. त्यानंतर जिल्ह्याला अनुदान वितरित करण्यात येईल.