वैशाली माने पोलीस उपायुक्तपदी रूजू

अमरावती : पुणे सीआयडीला कार्यरत वैशाली माने या सोमवारी शहर आयुक्तालयात पोलीस उपायुक्त (मुख्यालय) म्हणून रुजू झाल्या. पोलीस उपायुक्त विक्रम साळी यांच्याकडून त्यांनी पदभार स्वीकारला. अमरावतीमध्ये काम करीत असताना आपला प्रोफेशनॅलिझमवर भर राहील, असे त्या म्हणाल्या.

मूळच्या साताराच्या असलेल्या माने या सन २०११ मध्ये महाराष्ट्र पोलीस सेवेत रुजू झाल्या. त्यांनी सिंधुदुर्ग येथे परीविक्षाधीन कार्यकाळ पूर्ण केला. त्यानंतर त्या कोल्हापूर, पुणे शहरातदेखील सहायक पोलीस आयुक्तपदी कार्यरत होत्या. सीआयडी, पुणे येथे दोन वर्षांचा कार्यकाळ पूर्ण झाल्याने त्यांची बदली अमरावती शहर आयुक्तालयात पोलीस उपायुक्तपदी झाली. एलएलएम असलेल्या माने यांनी पुणे व सातारा येथे वकिलीदेखील केली आहे.