गावठी दारू गाळणारा सहा महिन्यांकरिता स्थानबद्ध

नांदगाव खंडेश्वर : हातभट्टीची दारू गाळून विक्री करणाऱ्याविरुद्ध कठोर पावले उचलून तालुक्यातील येवती येथील आरोपी नरेंद्र संगीतराव सोनबावणे (३५) याला सहा महिन्यांसाठी अमरावती जिल्हा कारागृहात स्थानबद्ध करण्यात आले. एमपीडीए कायद्यांतर्गत केलेली ही जिल्ह्यातील पहिली कारवाई ठरली आहे.

पोलीस सूत्रांनुसार, सदर इसमावर यापूर्वी हातभट्टीची दारू तयार करणे, अवैध दारूची वाहतूक व विक्री प्रकरणात विविध कलमान्वये प्रतिबंधक कारवाई करण्यात आली होती. पण, त्याच्यावर या कारवाईचा काहीही परिणाम झाला नसल्याने याला आळा बसावा, यासाठी जिल्हा पोलीस अधीक्षकांनी या इसमाला स्थानबद्ध करण्याबाबतचा प्रस्ताव जिल्हा दंडाधिकारी शैलेश नवाल यांच्याकडे सादर केला होता. त्यांनी सर्व कायदेशीर बाबींची पडताळणी केल्यानंतर व सदर इसम सराईत हातभट्टीवाला असल्याची खात्री पटल्यानंतर त्याला सहा महिन्यांसाठी अमरावती जिल्हा कारागृहात स्थानबद्ध ठेवण्याचा आदेश ५ मे रोजी पारित केला.

नांदगाव पोलिसांनी या इसमाचा शोध घेऊन अमरावती जिल्हा कारागृहात स्थानबद्ध केले. पोलीस अधीक्षक हरिबालाजी एन. यांच्या मार्गदर्शनात स्थानिक गुन्हे शाखेचे पोलीस निरीक्षक तपन कोल्हे, सहायक पोलीस निरीक्षक गोपाल उपाध्याय, प्रवीण अंबाडकर तसेच नांदगाव पोलीस ठाण्याचे पोलीस निरीक्षक हेमंत ठाकरे, पोलीस निरीक्षक गोपाल उंबरकर, चंद्रकांत कोष्टी, प्रशांत बेलोकर, राजेश इरपाते यांनी ही कारवाई केली.