मतदार यादीचा पुनरिक्षण कार्यक्रम जाहीर

अमरावती : भारत निवडणूक आयोगाच्या निर्देशानुसार २ जानेवारी २०२२ या अर्हता दिनांकावर आधारित छायाचित्र मतदार यादीचा विशेष संक्षिप्त पुनरिक्षण कार्यक्रम जाहीर केला आहे. नवीन मतदार नोंदी, स्थानांतरणाबाबत वगळणी आदींबाबत नागरिकांनी कर्मचाऱ्यांना माहिती देऊन सहकार्य करावे, असे आवाहन जिल्हाधिकारी पवनीत कौर यांनी केले आहे.

पुनरिक्षण कार्यक्रम ९ ऑगस्ट ते ३१ ऑक्टोबरपर्यंत राबविण्यात येणार आहे. दुबार, समान नोंदी, एकापेक्षा अधिक नोंदी, तांत्रिक त्रुटी दूर करणे, मतदान केंद्रस्तरीय अधिकाऱ्यांव्दारे घरोघरी भेट देऊन तपासणी, पडताळणी, योग्यप्रकारे विभाग तयार करणे आणि मतदान केंद्राचे सुसूत्रीकरण व प्रमाणीकरण करण्यात येणार आहे.

बॉक्स

असा आहे कार्यक्रम

एकीकृत प्रारूप मतदार यादी १ नोव्हेंबर रोजी प्रसिद्ध होईल. दावे व हरकती स्वीकारण्याचा कालावधी १ ते ३० नोव्हेंबर, विशेष मोहिमांचा कालावधी दावे व हरकती स्वीकारण्याच्या कालावधीत मुख्य निवडणूक अधिकारी यांनी निश्चित केलेल्या दिनांकानुसार असेल. दावे व हरकती २० डिसेंबरपर्यंत निकाली काढण्यात येतील. मतदारयादीची अंतिम प्रसिध्दी ५ जानेवारी २०२२ रोजी करण्यात येणार आहे.

बॉक्स

नवतरुणांनी नोंदी कराव्यात

१ जानेवारी २०२२ रोजी ज्यांना वयाची १८ वर्षे पूर्ण होत आहेत, अशांनी नवमतदार म्हणून आपली नोंद मतदार यादीत करून घ्यावी. तसेच पात्र असूनही ज्या नागरिकांची नावे मतदारयादीत नाहीत, त्यांनीसुध्दा आपली नावे यादीत नोंदवावीत. तसेच जे मतदार स्थानांतरित झालेले आहेत, त्यांनी तसेच मरण पावलेल्या मतदारांच्या संदर्भात त्यांच्या नातेवाईकांनी आवश्यक माहिती मतदान केंद्रस्तरीय अधिकाऱ्यांना देऊन आपल्या नावाचे स्थानांतरण किंवा वगळणीकरिता सहकार्य करावे, असे आवाहन जिल्हाधिकारी पवनीत कौर यांनी केले आहे.