वडाळीत नवीन बायपासवरून चार मुले हरवली

अमरावती : येथील वडाळी परिसरात सुपर एक्स्प्रेस हायवेच्या नवीन बायपासवरून चार चिमुकली मुले हरविली. मात्र, ती अद्यापही गवसलेली नाहीत. ती घटना २३ ऑगस्ट रोजी घडली होती. याबाबत जयसिंह दौलतराव चव्हाण (३३, नवीन बायपास, वडाळी) यांच्याकडून ३० ऑगस्ट रोजी फ्रेजरपुरा पोलिसांना प्राप्त झाली. याबाबत अज्ञातांविरुद्ध कलम ३६३ अन्वये गुन्हा नोंदविण्यात आला आहे. या मुलांबाबत कुठलीही माहिती मिळताच माहीतगारांनी तात्काळ फ्रेजरपुरा पोलीस किंवा पोलीस नियंत्रण कक्षाला कळविण्याचे आवाहन करण्यात आले आहे.

जयसिंह चव्हाण यांची उज्जेर जयसिंह चव्हाण (११) व जयश्री जयसिंह चव्हाण (८) ही दोन मुले तसेच जयसिंह यांची बहीण शशिकला नारायण सूर्यवंशी यांची पवन नारायण सूर्यवंशी (७) व भूरी नारायण सूर्यवंशी (९) ही दोन मुले असे चौघे परिसरात आजूबाजूला खेळत होते. काही वेळाने फिर्यादीची बहीण मुलांना बोलावून आणण्यासाठी गेली असता तिला चारही मुले दिसली नाहीत. फिर्यादी व त्यांच्या नातेवाईकांनी सर्व ठिकाणी शोध घेतला असता ही मुले आढळली नाहीत. त्यामुळे जयसिंग चव्हाण यांनी फ्रेजरपुरा पोलिसांकडे तक्रार दाखल केली. चारही बालक मराठी, हिंदी व लोहारी बोली बोलतात.

///////////

येथे साधा संपर्क

ती चारही बालके आढळल्यास फ्रेजरपुरा पोलीस ठाण्यात किंवा नियंत्रण कक्षाशी संपर्क साधावा, असे आवाहन पोलीस उपायुक्त व ठाणेदार राहुल आठवले, गुन्हे पोलीस निरीक्षक नितीन मगर यांनी केले आहे.