म्युकरमायकोसिसबाबत वैद्यकीय तज्ज्ञांची कार्यशाळा

(फोटो)

अमरावती : कोरोनाबाधितांवर शासनाचे मार्गदर्शक सूचनांनुसार ट्रीटमेंट प्रोटोकॉल, शासनाने ठरवून दिलेले दर आकारणे, हॉस्‍पिटल प्रीपेडनेस, म्‍युकरमायकोसिस व इतर आनुषंगिक विषयांबाबत वैद्यकीय तज्ज्ञांची जिल्‍हाधिकारी शैलेश नवाल व महापालिका आयुक्त प्रशांत रोडे यांच्या उपस्थितीत शनिवारी बचत भवन येथे कार्यशाळा घेण्यात आली.

म्‍युकरमायकोसिस साधारणत: रक्तात साखरेचे प्रमाण नियंत्रणात नाही, अशा कोरोनातून बरे झालेल्‍या रुग्‍णांमध्‍ये आढळून येत आहे. प्राथमिक स्‍तरावर उपचार झाल्‍यास या आजाराची जोखीम कमी होऊ शकते. कुठलेही लक्षणे आढळल्‍यास नाक-कान-घसा तज्ज्ञांशी संपर्क साधणे गरजेचे आहे. या आजाराच्या नियंत्रणासाठी त्याचे लवकर निदान आवश्यक असते. त्यात एमआरआय विथ कॉन्ट्रास्टची आवश्यकता असल्याचे नाक-कान-घसा तज्ज्ञ डॉ. क्षितीज पाटील यांनी सांगितले.

औषधे आवश्‍यक असल्‍यासच देण्‍यात यावी. विनाकारण जास्‍तीचे औषध दिल्‍यास त्‍याचा विपरित परिणाम होण्‍याची शक्‍यता असते. शासनाने दिलेल्‍या दिशानिर्देशानुसारच औषधोपचार केला पाहिजे, असे डॉ प्रफुल्ल कडू म्हणाले.

याप्रसंगी ऑक्सिजन ऑडिट, इलेक्ट्रिक ऑडिट, स्‍ट्रक्‍चरल ऑडिट त्‍वरीत करुन घेण्‍याचे सुचित केले. प्रत्‍येक हॉस्‍पीटलने रेट बोर्ड लावावा तसेच हॉस्पिटलची रिपोर्टिंग व सर्व रेकॉर्ड व्यवस्थित ठेवण्याच्या सूचना आयुक्त प्रशांत रोडे यांनी केल्या. कार्यशाळेला जिल्‍हा शल्‍यचिकित्‍सक डॉ. श्‍यामसुंदर निकम, डॉ. विशाल काळे, डॉ. अजय डफळे, डॉ. विजय बख्‍तार, डॉ. विक्रांत राजुरकर, डॉ. जयश्री नांदुरकर, डॉ. फिरोज खान, नोडल अधिकारी तसेच नाक-कान-घसा तज्ज्ञ संघटनेचे पदाधिकारी उपस्थित होते.

बॉक्स

म्युकरमायकोसिस रुग्णांना प्राथमिकता द्या

म्युकरमायकोसिस आजाराच्‍या रुग्‍णांना प्राथमिकता देऊन त्‍यांची तपासणी व त्‍वरित औषधोपचार सुरू करावा. प्रत्‍येक रुग्‍णालयाने मागितलेली माहिती त्‍वरित देणे अपेक्षित आहे. बेडची संख्‍या त्‍वरीत उपलब्‍ध करुन देणे गरजेचे आहे. दिलेल्‍या औषधोपचाराची संपुर्ण माहिती तयार करुन ठेवावी. जे आवश्‍यक औषधी आहे त्‍याची नोंद झालीच पाहिजे. अनावश्‍यक औषध रुग्‍णांना देऊ नये, अशी सूचना जिल्हाधिकाऱ्यांनी केली.