Auto Expo 2018: Maruti Suzuki कडून Future S संकल्पनेचे अनावरण; जाणून घ्या खास गोष्टी

भारतातील ग्राहक वाहन खरेदी करताना त्यामधील सुविधांना विशेष प्राधान्य देतात.

नवी दिल्ली: देशातील सर्वात मोठी कार उत्पादक कंपनी असलेल्या Maruti Suzuki ने दिल्लीत सुरु झालेल्या Auto Expo 2018 मध्ये बुधवारी आपल्या इलेक्ट्रिक कारच्या Future S संकल्पनेचे अनावरण केले. Maruti Suzuki e-Survivor ही एक ओपन टॉप, दोन आसनी स्पोर्टस युटिलिटी व्हेईकल प्रकारात मोडणारी गाडी आहे. Future S संकल्पनेचा वापर करून या अद्यायावत गाडीचे डिझाईन करण्यात आले आहे. 

Maruti Suzuki e-Survivor गाडीच्या अनावरणप्रसंगी Maruti Suzuki चे व्यवस्थापकीय संचालक आणि सीईओ केनेची अयुकवा यांनी म्हटले की, भारतातील ग्राहक वाहन खरेदी करताना त्यामधील सुविधांना विशेष प्राधान्य देतात. ग्राहकांना वाहनांमध्ये जास्तीत जास्त सुविधा हव्या असतात. त्यासाठी Maruti Suzuki सातत्याने काम करत असल्याचे त्यांनी म्हटले. 

केंद्र सरकार 2030 पर्यंत देशात इलेक्ट्रिक वाहनांसाठी अनुकूल वातावरण निर्माण करण्यासाठी प्रयत्नशील आहे. केंद्रीय मंत्री नितीन गडकरी यांनी सर्व भारतीय कंपन्यांना यासंबंधी निर्देश दिले आहेत. Maruti Suzuki ने 2020 पर्यंत भारतात पहिली इलेक्ट्रिक कार लाँच करण्याचे ध्येय समोर ठेवले आहे. Maruti  आणि Toyota या दोन्ही कंपन्या त्यासाठी संयुक्तपणे काम करत आहेत. दरम्यान, दिल्लीतील Auto Expo 2018 मध्ये Maruti Suzuki e-Survivor शिवाय 2018 Maruti Suzuki Swift आणि कंपनीने नव्याने डिझाईन केलेली Future S संकल्पना लोकांच्या आकर्षणाचा केंद्रबिंदू ठरण्याची शक्यता आहे. 

यंदाच्या ऑटो एक्सपोमध्ये 24 नव्या गाडया लाँच होतील. या एक्सपोमध्ये 100 कंपन्या सहभागी होणार आहेत. मागच्यावेळी 88 कंपन्या होत्या अशी माहिती सोसायटी ऑफ इंडियन ऑटोमोबाइल मॅन्युफॅक्चर्सचे अध्यक्ष अभय फिरोदिया यांनी दिली. विशेष म्हणजे मागच्यावर्षी एक्सपोमध्ये 11 स्टार्ट-अप कंपन्या सहभागी झाल्या होत्या. यावेळी फक्त दोन कंपन्या सहभागी होणार आहेत. एसीएमएम, सीआयआय आणि सियाम या तिघांनी मिळून संयुक्तपणे ऑटो एक्सपो : द मोटर शो 2018 चे आयोजन केले आहे. या शो ला इंटरनॅशनल ऑर्गनायझेशन ऑफ मोटर व्हेइकल मॅन्युफॅक्चर्स संघटनेची मान्यता आहे. 

आठ लाखापेक्षा जास्त लोक या ऑटो एक्सपोमध्ये सहभागी होतील अशी शक्यता आहे. सर्वसामान्य 9 ते 14 जानेवारी दरम्यान सहभागी होऊ शकतात. या शो मध्ये 36 पेक्षा जास्त ऑटोमेकर्स आपल्या गाडया, एसयूव्ही, टू व्हीलर आणि कमर्शिअल वाहने प्रदर्शनासाठी मांडणार आहेत. इलेक्ट्रीक वाहने या ऑटो एक्सपोचे खास वैशिष्टय असेल. या ऑटो एक्सपोत बिझनेस हवर्समध्ये तिकीटाचे दर 750 रुपये आहेत. पब्लिक हवर्समध्ये तिकिटाची किंमत 350 रुपये आहे. बिझनेस हवर्स सकाळी 10 ते 1 पर्यंत असेल तर पब्लिक हवर दुपारी 1 ते संध्याकाळी सहा वाजेपर्यंत असेल. वीकएण्डला तिकिटाची किंमत 475 रुपये आहे.