फक्त कारच नाही तर बाईकही CNG वर चालणार, बजाज लवकरच लाँच करणार!

Bajaj CNG Bike : बजाज आपल्या सर्व सीएनजी बाईक एकाच प्लॅटफॉर्मवर तयार करणार आहे.

नवी दिल्ली : बजाज ऑटोने अलीकडेच 'बजाज ब्रुझर' नंतर 'बजाज फायटर' नावाची प्लेट ट्रेडमार्क केली आहे. दरम्यान, आगामी बजाज सीएनजी बाईक आणि नवीन अॅडव्हेंचर बाईकसाठी कोणते नाव वापरले जाईल, याबद्दल अद्याप कोणतीही अधिकृत माहिती नाही. दुचाकी बनवणाऱ्या बजाज कंपनीने ५ ते ६ सीएनजी बाईक (दरवर्षी एक उत्पादन) लाँच करण्याच्या योजनेची पुष्टी केली आहे. 

बजाज आपल्या सर्व सीएनजी बाईक एकाच प्लॅटफॉर्मवर तयार करणार आहे. बजाजची पहिली सीएनजी बाईक १८ जून २०२४ ला लाँच केली जाऊ शकते. बजाज सीएनजी बाईक (ब्रुझर किंवा फायटर), जी अनेकदा टेस्टिंगदरम्यान पाहण्यात आली आहे. या बाईकला ११०cc-१२५cc इंजिनसह सीएनजी किट मिळण्याची शक्यता आहे. यामध्ये आपत्कालीन परिस्थितीसाठी एक छोटी पेट्रोल टाकीही देण्यात येणार आहे. 

या बाईकच्या बॉडीबद्दल बोलायचे झाले तर यामध्ये टेलिस्कोपिक फोर्क आणि मोनोशॉक रिअर साइडमध्ये दिले जाईल. याचबरोबर, बाईकमध्ये स्टॉपिंग पॉवर फ्रंट डिस्क आणि रिअर ड्रम ब्रेकसह येईल. सीएनजी बाईक १७-इंचाच्या फ्रंट आणि रिअर व्हिलसह असेंबल केली जाऊ शकते. दरम्यान, लीक झालेल्या फोटोवरून असे दिसून आले आहे की. 

नवीन बजाज फायटर किंवा ब्रुझरमध्ये बॉक्सी बॉडी असेल, ज्यामध्ये गोल हेडलॅम्प, ब्रेस्ड हँडलबार आणि एक लांब सिंगल-पीस सीट असणार आहे. सीटच्या अगदी खाली सीएनजी किट बसवले जाईल. मार्केटमध्ये बजाजच्या या बाईकसोबत इतर कोणत्याही बाईकची थेट स्पर्धा नसणार आहे. मात्र, ही बाईक TVS Radeon, Hero Splendor Plus आणि Honda Shine १०० बाईकच्या सेगमेंटमध्ये असणार आहे. बजाजच्या पहिल्या सीएनजी बाईकची किंमत ८०,००० रुपये असू शकते. 

नवीन बजाज सीएनजी बाईकमध्ये नवीन टेक्नॉलॉजी असेल आणि बाजारात सध्या असलेल्या इलेक्ट्रिक स्कूटरइतकी स्वस्त नसेल, असे बजाज कॅपिटल लिमिटेडचे ​​अध्यक्ष आणि व्यवस्थापकीय संचालक राजीव बजाज यांनी सांगितले होते. दरम्यान, आगामी बजाज सीएनजी बाईकबद्दल अधिक माहिती येत्या काही काळात आणखी समोर येईल.