थारसारख्या या SUV ला मिळतेय जबरदस्त बुकिंग, कॅन्सल केल्यास कंपनीच देतेय दोन लाख रुपये...

आजकाल सर्वच कार निर्मात्य़ा कंपन्यांना असे वाटत असते की त्यांच्या कारला बुकिंगवर बुकिंग मिळाव्यात. पण एका कंपनीवर अशी वेळ आली आहे की त्यांच्या एसयुव्हीला एवढी बुकिंग मिळालीय की ती कॅन्सल करणाऱ्या ग्राहकांना ही कंपनी आपल्या पदरचे दोन लाख रुपये देत आहे. 

भारतातून सोडून गेलेल्या फोर्ड कंपनीवर ही वेळ आली आहे. फोर्डने २०२१ मध्ये नवीन एसयुव्ही ब्राँको लाँच केली होती. या एसयुव्हीने बाजारात येताच धुमाकुळ घालण्यास सुरुवात केली होती. आता या 'थार'सारख्या दिसणाऱ्या कारला एवढी बुकिंग मिळाली आहेत कंपनी ग्राहकांची मागणी पूर्ण करू शकत नाहीय. यामुळे जे ग्राहक Bronco ची बुकिंग रद्द करून दुसरे मॉडेल बुक करतील त्यांना कंपनीने दोन लाख रुपयांचा डिस्काऊंट जारी केला आहे. 

ग्लोबल मीडिया कार्स डायरेक्टच्या रिपोर्टनुसार फोर्ड ब्रोंकोच्या ग्राहकांना ती रद्द करून दुसरी कार बुक करण्यासाठी दोन लाखांची सूट देत आहे. डीलरना याबाबतचे मेल पाठविण्यात आले आहेत. ही सूट २५०० डॉलर्स एवढी आहे. 3 एप्रिलपूर्वी जे ब्रोंको बुक करणारे ग्राहक दुसरी वाहने बुक करतील त्यांच्यासाठी ही ऑफर जाहीर करण्यात आली आहे. 

कार आणि ड्रायव्हरच्या अहवालानुसार, फोर्डचे म्हणणे आहे की पुरवठा-साखळी अचानक एक मोठे आव्हान बनले आहे. पुरवठ्यातील अडचणींमुळे, या SUV वर ऑफर केलेली काही फिचर्स दिली जाऊ शकत नाहीएत. यामध्ये Sasquatch, Luxe Package आणि Molded in Color Hard Top आदींचा समावेश आहे. या एसयूव्हीचे बुकिंग रद्द करून दुसऱ्या मॉडेलवर जाण्यासाठी ग्राहकांना कंपनीने ऑफर जारी केली आहे. कंपनीच्या या डीलमध्ये Escape, Bronco Sport, Edge, Explorer, Expedition, Ranger आणि F-150 मॉडेल्सचा समावेश आहे. म्हणजेच ग्राहकांना यापैकी एक मॉडेल निवडावे लागणार आहे.