भारतात लवकरच लाँच होणार Hyundai ची EV Ioniq 5; जबरदस्त लूक अन् डिझाईन!

ह्युंदाई मोटार इंडिया लिमिटेड कंपनी (Hyundai Motor India Limited) यंदाच्या वर्षात अनेक उत्पादनं बाजारात दाखल करण्याची शक्यता आहे. या यादीमध्ये Hyundai ची नवीन इलेक्ट्रिक कार Ioniq 5 चाही समावेश आहे. जी अलीकडेच भारतात चाचणी करताना पाहिली गेली आहे. मिळालेल्या माहितीनुसार, इलेक्ट्रिक कारला रेट्रो डिझाईन थीम देण्यात आली असून ती जागतिक स्तरावर आधीच समोर आली आहे. नवीन इलेक्ट्रिक कार (Hyundai Ioniq 5) लवकरच भारतात लॉन्च केली जाऊ शकते. ही कार चेन्नईच्या बाहेरील भागात दिसली आहे जिथे ब्रँडची श्रीपेरुंबदुर उत्पादन सुविधा आहे. Ioniq 5 हे E-GMP स्केटबोर्ड आर्किटेक्चरवर आधारित कंपनीचे पहिले समर्पित इलेक्ट्रिक वाहन आहे.

युरोपियन कार ऑफ द इयर ठरलेली Kia EV6 शी बरेच साम्य ह्युंदाईच्या नव्या कारमध्ये असल्याचं बोललं जात आहे. Hyundai ने अलीकडेच भारतात शून्य उत्सर्जन वाहने आणण्याचा एक भाग म्हणून मोठ्या गुंतवणुकीची घोषणा केली. 2028 पर्यंत किमान सहा नवीन EV कार आणण्याचं उद्दीष्ट कंपनीचं आहे. या श्रेणीमध्ये Ioniq 5 कारचाही समावेश असेल. 

Ioniq 5 चे डिझाइन
Ioniq 5 CBU मार्गाने देशात आणले जाऊ शकते आणि विशेषत: भारतासाठी विकसित केलेल्या अधिक व्हॉल्यूम-आधारित ईव्हीच्या आगमनापूर्वी ते फ्लॅगशिप इलेक्ट्रिक वाहन म्हणून बनवले जाऊ शकते. डिझाईनच्या बाबतीत, Ioniq 5 मध्ये एक यूनिक एक्सटीरियर पिक्सेलेटेड लाइट एलिमेंट, 20-इंच अलॉय व्हील, पॉप-आउट डोअर हँडल आणि चार्जिंग पोर्टसह 45 EV संकल्पना असू शकते. 

उपकरणांच्या यादीमध्ये ऑगमेंटेड रिअॅलिटी टेकसह हेड-अप डिस्प्ले आणि ट्विन-स्क्रीन सेटअप समाविष्ट आहे. इको-फ्रेंडलीवर जोर देऊन, Ioniq 5 सीट आणि इतर घटकांसाठी रिसायकल केलेल्या प्लास्टिकच्या बाटल्यांचा वापर करण्यात आला आहे. 

Ioniq 5 ची वैशिष्ट्ये
Hyundai Ioniq 5 एक फ्लॅट फ्लोअर कार आहे आणि आतील भागात भरपूर जागा उपलब्ध असणार आहे. कार ब्लूलिंक कनेक्टिव्हिटी आणि अॅडव्हान्स ड्रायव्हर-असिस्टंट तसंच सुरक्षा तंत्रज्ञानासह देखील येते. जागतिक बाजारपेठेत ही 58 kWh आणि 72.6 kWh बॅटरी पॅकमध्ये उपलब्ध आहे. 800 व्होल्ट तंत्रज्ञान वापरून, ते 220 kW DC चार्जरद्वारे केवळ 18 मिनिटांत 10 ते 80 टक्के चार्ज होऊ शकते.