बीडच्या कबाड गल्लीत १ लाख ६४ हजारांची देशी दारू जप्त

बीड : शहरातील कबाड गल्ली भागात एका घरावर राज्य उत्पादन शुल्क विभागाच्या पथकाने धाड टाकून १ लाख ६४ हजार रुपये किमतीची देशी दारू जप्त केली. शुक्रवारी दुपारी ही कारवाई करण्यात आली.

सध्या कोरोना विषाणूच्या प्रादुर्भावाने सर्वत्र लॉकडाऊन करण्यात आले असून सर्व दारू दुकाने बंद आहेत. अशावेळी मद्याची अवैधरीत्या विक्री होऊ नये, याकरिता राज्य उत्पादन शुल्क विभागाची पथके जिल्हाभरात करडी नजर ठेवत आहे. २१ मे रोजी राज्य उत्पादन शुल्क विभागाच्या पथकाने बीड शहर पोलीस ठाणे हद्दीतील कबाड गल्ली येथे अंकुश वसंतराव कदम याच्या राहत्या घरी धाड टाकली. यावेळी वाहन पार्किंगच्या जागेत जिन्याखाली देशी दारूचा साठा लपवून ठेवला असल्याचे दिसून आले.

सदर ठिकाणी देशी दारू संत्रा या ब्रँडचे १८० मिली क्षमतेचे ५७ बॉक्स जप्त केले. ज्याची किंमत १ लाख ६४ हजार १६० रुपये इतकी आहे. कबाड गल्ली,बीड याने लॉकडाऊनमध्ये अवैधरीत्या विक्री करण्याच्या उद्देशाने आरोपी अंकुश कदम याने हा दारूसाठा ठेवला होता. आरोपी हा फरार असून त्याचा शोध सुरू आहे. या गुन्ह्यात अंकुश कदम याच्याकडून देशी दारू खरेदी करण्याकरिता आलेला इसम नामे दादासाहेब सदाशिव कांबळे (रा. पंचशील नगर, बीड) यालाही अटक करण्यात आलेली आहे. दोन्ही आरोपींविरुद्ध महाराष्ट्र दारूबंदी कायदा,१९४९ चे कलमान्वये गुन्हा नोंदविण्यात आला आहे. ही कारवाई राज्य उत्पादन शुल्क विभागाचे आयुक्त कांतीलाल उमाप, जिल्हाधिकारी रवींद्र जगताप, उत्पादन शुल्कचे विभागीय उपायुक्त प्रदीप पवार यांच्या सूचनेनुसार राज्य उत्पादन शुल्कचे बीड येथील अधीक्षक नितीन धार्मिक यांच्या मार्गदर्शनाखाली निरीक्षक कडवे, दुय्यम निरीक्षक घोरपडे, नायबळ, शेळके, गायकवाड, जवान नजमा शेख, मोरे , मस्के, सादेक अहमद, गोणारे व जवान-निवाहन चालक जारवाल, शेळके यांनी केली.

--------

९७ गुन्हे, एक कोटींचा मुद्देमाल जप्त

लॉकडाऊन कालावधीत १ एप्रिल २०२१ पासून राज्य उत्पादन शुल्क विभागाने जिल्हाभरात अवैध दारु विक्री विरोधात राबविलेल्या मोहिमेत ९७ गुन्हे नोंदविले असून ५२ आरोपींना अटक करण्यात आलेली आहे. या कालावधीत देशी विदेशी दारुचा मुद्देमाल व वाहनासह एकूण एक कोटी रूपये किमतीचा मुद्देमाल जप्त करण्यात आला आहे.

-----------

अवैध धाबे, दारु विक्री केंद्रे तसेच हातभट्टीच्या ठिकाणांवर वारंवार विभागाकडून धाडी टाकण्यात येत असून लॉकडाऊन कालावधीत जिल्हाधिकारी, बीड यांच्या आदेशान्वये सर्व मद्यविक्री अनुज्ञप्त्या बंद राहतील, याकरिता विभागाकडून तपासणी करण्यात येत आहे. अवैध दारू , हातभट्टीची दारू व परराज्यातील दारू विरोधात सातत्याने मोहीम राबविण्यात येत असून अशा कारवाया सुरूच राहतील, असे राज्य उत्पादन शुल्क विभागाचे अधीक्षक नितीन धार्मिक यांनी सांगितले.

===Photopath===

210521\21_2_bed_3_21052021_14.jpeg

===Caption===

बीडच्या कबाड गल्लीत १ लाख ६४ हजाराची देशी दारू जप्त