सततच्या छेडछाडीला कंटाळून १६ वर्षीय मुलीची आत्महत्या

या प्रकरणी दोघांविरोधात गुन्हा दाखल करण्यात आला आहे.

ठळक मुद्देराहत्या घरी विषारी औषधी प्राशन केले उपचारादरम्यान जिल्हा रूग्णालयात मृत्यू

वडवणी (बीड ) : सततच्या छेडछाडीस कंटाळून कंटाळून एका 16 वर्षीय मुलीने राहत्या घरी विषारी द्रव्य प्राशन केल्याची घटना ८ जानेवारीस तालुक्यातील ब्रह्मनाथ तांडा येथे घडली होती. या मुलीचा मंगवारी (दि. २२ ) जिल्हा रुग्णालयात उपचारा दरम्यान मृत्यू झाला.

याबाबत अधिक माहिती अशी की, तालुक्यातील ब्रह्मनाथ तांडा येथील स्वाती गोविंद राठोड (१६) ही नववीच्या वर्गात शिक्षण घेत होती. स्वाती शाळेत जाताना अमर तिडके ( रा.भोगलवाडी ) व हनुमान सावंत (रा. उपळी हल्ली मुक्काम तेलगाव ) हे तिची सातत्याने छेड काढत. याला कंटाळून स्वातीने दि. ८ जानेवारीस राहत्या घरी विषारी द्रव्य प्राशन केले. यानंतर तिला बीड येथील जिल्हा रुग्णालयात दाखल करण्यात आले. माञ, उपचारादरम्यान मंगळवारी (दि.२२) दुपारी 1 च्या सुमारास तिचा मृत्यू झाला. 

याप्रकरणी स्वातीचे वडील गोविंद किसन राठोड यांच्या फिर्यादीवरून वडवणी पोलिस ठाण्यात अमर तिडके व हनुमान सावंत या दोघांविरोधात आत्महत्येस प्रवृत्त केल्याप्रकरणी गुन्हा दाखल करण्यात आला आहे. पुढील तपास पोलिस उपनिरीक्षक ए एस सिध्धीकी हे करत आहेत.