पुन्हा लॉकडाऊन परवडणारे नाही; मास्क व सोशल डिस्टसिंग हाच पर्याय

लोकमत न्यूज नेटवर्क

बीड : मागील काही दिवसांपासून राज्यात कोरोनाची रुग्णसंख्या झपाट्याने वाढत आहे. त्यामुळे लॉकडाऊनची शक्यता वर्तविली जात आहे. हाच धागा पकडून बीडच्या व्यापारी, उद्योजकांशी संवाद साधला. त्यांनी पुन्हा लॉकडाऊन परवडणारे नसल्याचे सांगत सर्वांनी कोरोना नियमांचे पालन करून मास्क व सोशल डिस्टन्स ठेवणे हाच पर्याय असल्याचे सांगितले.

जिल्ह्यात आतापर्यंत २ लाख ८ हजर ४४९ कोरोना चाचण्या करण्यात आल्या आहेत. पैकी १ लाख ९० हजार ३३ अहवाल निगेटिव्ह आले आहे तर १८ हजार ४१६ जणांचा अहवाल पॉझिटिव्ह आलेला आहे. यातील १७ हजार ५४५ कोरोनामुक्त झाले असून ५७३ रूग्णांचा कोरोनामुळे मृत्यू झाला आहे.

दरम्यान, मागील आठवड्यापासून राज्यासह जिल्ह्यात कोरोनाबाधित रुग्णांची संख्या वाढत आहे. त्यामुळे पुन्हा लॉकडाऊन होण्याची शक्यता आहे. परंतु आगोदरच लॉकडाऊनमुळे अर्थव्यवस्था कोलमडली आहे. शिवाय हालही झाले. त्यामुळे पुन्हा लॉकडाऊन परवडणारे नसल्याचे सांगत व्यापाऱ्यांनी प्रशासनाने जनजागृती करावी, असे सांगितले.

काळजी घ्या, धोका वाढताेय

मागील आठवड्यापासून जिल्ह्यात कोरोनाबाधित रुग्णांची संख्या वाढत आहे. दोन दिवसांपासून तर नव्या रुग्णसंख्येने अर्धशतक ओलांडले आहे. यावरून कोरोनाचा धोका वाढत असल्याचे दिसत आहे. त्यामुळे नागरिकांनी कोरोना नियमांचे पालन करून स्वत:ची व कुटुंबाची काळजी घ्यावी, असे डीएचओ डॉ.आर.बी. पवार म्हणाले.

व्यापारी, उद्योग संघटनांचे प्रतिनिधी म्हणतात....

लॉकडाऊन हा १०० टक्के पर्याय असूच शकत नाही. मास्क व सोशल डिस्टन्स ठेवणे, स्वत:ची आणि कुटुबाची काळजी घेणे गरजेचे आहे. शाळेतही मुलांची काळजी घ्यावी.

- अरविंद पाटील

व्यापारी बीड

लॉकडाऊन, नाईट कर्फ्यू हे पर्याय प्रभावी ठरत नाहीत. आधीच संपूर्ण वर्ष व्यापार क्षेत्रासाठी अडचणीचे ठरलेले आहे. पुन्हा लॉकडाऊन करणे चुकीचे वाटते. जनतेने काळजी घेणे महत्त्वाचे.

- भास्कर गायकवाड

व्यापारी, बीड शहर

लॉकडाऊनमुळे आगोदरच लोक सफर झाले आहेत. त्यामुळे पुन्हा लॉकडाऊन करू नये. केवळ काळजी घ्यावी आणि घ्यायला सांगावी, एवढेच प्रशासनाने आवाहन करावे.

- जयकिशोर बियाणी

उद्योजक, बीड