माजलगावमध्ये बदलापूरसारखी घटना; नामांकित शाळेच्या अंगणवाडीत चिमुकलीवर अत्याचार

या प्रकरणी अज्ञाताविरुद्ध पोस्को गुन्हा दाखल करण्यात आला आहे

माजलगाव ( बीड) : राज्यात शाळेत शिक्षण घेणाऱ्या शाळकरी मुलींवर अत्याचाराच्या घटनांची मालिका सुरूच असून बीड जिल्ह्यातील माजलगाव येथील एका खासगी शाळेतील अंगणवाडीत साडेपाच वर्षाच्या मुलीवर अत्याचार झाल्याची संतापजनक घटना उघडकीस आली आहे. याप्रकरणी एका अज्ञाताविरुद्ध पोलिसांनी गुन्हा दाखल केला असून पुढील तपास सुरू आहे. 

राज्यात बदलापूरच्या घटनेने सर्वत्र खळबळ उडाली असून त्यानंतर दररोज कोठे ना कोठे शाळकरी मुलींवर अत्याचाराच्या, अन्यायाच्या घटना घडत असल्याच्या उघड होत आहेत. त्यामुळे पालक वर्गात अगोदरच भीतीचे वातावरण पसरलेले आहे. बीड जिल्ह्यातील माजलगाव शहरालगत असलेल्या एका  शाळेत अंगणवाडी आहे. त्यामध्ये परिसरातील लहान मुले-मुली दररोज येतात. या परिसरातीलच एक साडेपाच वर्षाची चिमुरडी नियमित शाळेत येते. तिच्यावर शाळेतील एका अज्ञात इसमाने २७ सप्टेंबर रोजी मधल्या सुटीतील डबा खाल्यानंतर अत्याचार केला. घटनेनंतर चिमुरडी ताप येऊन आजारी पडली. त्यामुळे तिला दवाखान्यात उपचार करण्यात आले. घरी आल्यावर चिमुकलीने शाळेत पांढरे कपडे घातलेल्या व्यक्तीने घाणेरडे कृत्य केल्याचे पालकांना सांगितली. शाळेतील पांढरे कपडे घातलेला त्या माणसाला मी ओळखते असेही सांगितले. 

चिमूरडीच्या माहितीने हादरलेल्या पालकांनी गुरुवारी थेट माजलगाव शहर पोलीस ठाणे गाठत तक्रार दिली. त्यानुसार अज्ञात व्यक्तीविरुद्ध लैंगिक अत्याचार पोस्को गून्हा दाखल करण्यात आला आहे. पुढील तपास पोलीस यंत्रणा उपविभागीय अधिकारी धीरजकुमार बच्चू यांच्या मार्गदर्शनाखाली पोलीस निरीक्षक राहुल सूर्यतळ व त्यांचे सहकारी करत आहेत. या घटनेने मात्र शहरात मोठी खळबळ उडाली आहे.