वाहतूक नियम तोडणे अंगलट, लायसन्स होऊ शकते रद्द !

बीड : वाहतूक नियमांचे उल्लंघन केल्याने दंड तर भरावाच लागतो, शिवाय वाहन चालविण्याचा परवाना देखील निलंबित होऊ शकतो. आठ महिन्यांत ३३२ जणांवर लायसन्स निलंबनाचा प्रस्ताव वाहतूक शाखेमार्फत संबंधित उपप्रादेशिक परिवहन अधिकाऱ्यांना पाठविल्याचे समोर आले आहे.

वाहतुकीच्या नियमांचे उल्लंघन करणाऱ्यांना 'ब्रेक' लावण्यासाठी पोलिसांकडून दंडात्मक कारवाई केली जाते. सोबतच पोलीस उपप्रादेशिक परिवहन अधिकाऱ्यांकडे वाहन चालविण्याचा परवाना निलंबित करण्याची शिफारस करू शकतात. यातून बेशिस्त वाहनचालकांवर वचक निर्माण करण्याचा प्रयत्न असतो.

आकडे बोलतात...

वर्ष लायसन्स निलंबन

२०२० २२५

२०२१ ३३२

....

अशी होते कारवाई...

वाहतूक नियमांचे उल्लंघन केल्यानंतर जिल्हा वाहतूक शाखेचे पोलीस निरीक्षक संबंधित वाहनचालकाकडून दंड वसूल करतात. त्यानंतर त्याचा वाहन चालविण्याचा परवाना रद्द करण्यासाठी त्याच्या जिल्ह्यातील उपप्रादेशिक परिवहन अधिकाऱ्यांकडे प्रस्ताव देतात. त्यावर उपप्रादेशिक परिवहन अधिकाऱ्यांकडून कार्यवाही होते.

....

आधी तीन महिने, नंतर कायमस्वरूपी

बेशिस्त वाहनचालकांना वठणीवर आणण्यासाठी सुरुवातीला तीन महिन्यांसाठी वाहन चालविण्याचा परवाना निलंबित केला जातो. त्यानंतर वारंवार चालक नियमांचा भंग करून निर्ढावलेपणा करत असल्यास, कायमस्वरूपी परवाना निलंबित केला जाऊ शकतो.

...

वाहतूक नियमांचे पालन करणे ही वाहनचालकांची जबाबदारी आहे. स्वत:च्या व इतरांच्या सुरक्षेसाठीही ते आवश्यक आहे. दंडात्मक कारवाईसह परवाना निलंबनाची यात तरतूद आहे. वाहनचालकांकडून वारंवार नियमांचे उल्लंघन होत असेल, तर कायमस्वरूपी परवाना निलंबित केला जाऊ शकतो. नियम पाळून सर्वांनी सहकार्य करावे.

- भागवत फुंदे, पोलीस निरीक्षक, जिल्हा वाहतूक शाखा, बीड

...

हे नियम मोडल्यास लायसन्सचे निलंबन...

- दुचाकी, चारचाकी वाहने चालविताना मोबाईलवर बोलणे गैर आहे.

- मादक द्रव्याचे सेवन करून किंवा नशा करून वाहने चालविल्यावरही परवाना निलंबित होऊ शकतो.

- सिग्नल तोडल्यास देखील अशी कारवाई होऊ शकते.

- अति वेगाने वाहन चालविल्यावर देखील परवाना निलंबन होते.

....