ब्रेथ ॲनालायझर धूळखात, वाहन चालवतात तळीराम झोकात

बीड : मद्यपान करून वाहन चालविल्यामुळे अपघात होण्याची शक्यता मोठ्या प्रमाणात असते. त्यामुळे वानचालकाने दारू पिलेली आहे का याची तपासणी करण्यासाठी ब्रेथ ॲनालायझरचा वापर केला जातो. मात्र, कोरोना संसर्गामुळे ब्रेथ ॲनालायझर धूळखात पडले असून, तळीराम सर्रास वाहन चालविताना मिळून येतात. त्यांच्यावर पोलिसांची करडी नजर असते, मागील वर्षभरात ३०३ गुन्हे विविध पोलीस ठाण्यात दाखल करण्यात आले आहेत.

मद्य प्राशन करून वाहन चालविल्यामुळे झालेल्या अपघातांची संख्या धुळे-सोलापूर व विशाखापट्टणम-कल्याण या महामार्गावर सर्वाधिक आहे. या अपघातात मृत्यू होणाऱ्यांमध्ये दुचाकीस्वर सर्वाधिक असल्याचे चित्र आहे. त्यामुळे सर्वांनी वाहतुकीचे नियम पाळून अपघात टाळावेत, असे आवाहन वाहतूक विभाग व महामार्ग पोलिसांकडून नागरिकांना वेळोवेळी केले जाते. कोरोना संसर्गामुळे वाहनचालकांनी दारू पिली आहे का याची तपासणी बंद आहे. मात्र, संशय आल्यानंतर पोलिसांकडून संबंधित चालकांचे रुग्णालयातून तपासणी करून ड्रक ॲन्ड ड्राईव्ह प्रकरणी गुन्हे दाखल केले जात आहेत.

आश्चर्य ! मेमध्ये कोणीच ड्रंक ॲन्ड ड्राईव्ह केले नाही

कोरोनाच्या पार्श्वभूमीवर मार्चअखेरीस लॉकडाऊन करण्यात आले होते. या काळात मद्यविक्रीवर निर्बंध होते. लॉकडाऊनमुळे बाहेर फिरणे बंद होते. त्यामुळे मेमध्ये ड्रंक ॲन्ड ड्राईव्हप्रकरणी एकही कारवाई करण्यात आलेली नाही. त्यानंतरदेखील डिसेंबरपर्यंत मागच्या वर्षीच्या तुलनेत कारवाया कमी झालेल्या आहेत.

चोरट्या पद्धतीने दारूविक्री

कोरोनाकाळात दारू विक्रीवर निर्बंध होते. त्या काळात चोरट्या पद्धतीने अनेक हॉटेल व वाईन शॉपवरून दारू विक्री चढ्या दराने केली जात होती. याकाळात दारूविक्री करणाऱ्यांवरदेखील गुन्हे दाखल करण्यात आले होते. तर, चोरट्या पद्धतीने दारूविक्री करून लॉकडाऊननंतर दारूबंदी विभागास माहिती द्यावी लागेल, या भीतीने अनेकांनी दारू चोरीला गेल्याची फिर्याद देत गुन्हे दाखल केले होते.

कोरोनाच्या पार्श्वभूमीवर यंत्राद्वारे तपासणी बंद आहे. मात्र, संशयित आढळल्यास त्या वाहनचालकाची रुग्णालयातून तपासणी करून कारवाई केली जात आहे.

कैलास भारती वाहतूक शाखाप्रमुख बीड

ड्रक ॲन्ड ड्राईव्ह कारवाई

महिना २०१९ २०२०

जानेवारी ५८ ८१

फेब्रुवारी १८ ३९

मार्च १२० ९७

एप्रिल ९ १

मे ७ ०

जून ५४ ४

जुलै ६३ १

ऑगस्ट १३ ३

सप्टेंबर १५ ३

ऑक्टोबर ६ ५

नोव्हेंबर ८३ २९

डिसेंबर ९९ ४०