कुत्र्याला वाचवताना कारला अपघात; महिलेसह ४ जखमी

तेलगाव ते धारूर राष्ट्रीय महामार्गावर भोगलवाडी फाटा येथे कारला अचानक कुत्रा आडवा आला. कुत्र्याला वाचवताना झालेल्या अपघातात कारमधील चौघे जखमी झाले असून, यात एका महिलेचा समावेश आहे.

ठळक मुद्देभोगलवाडी फाट्याजवळ घडली घटना

धारुर : तेलगाव ते धारूर राष्ट्रीय महामार्गावर भोगलवाडी फाटा येथे कारला अचानक कुत्रा आडवा आला. कुत्र्याला वाचवताना झालेल्या अपघातात कारमधील चौघे जखमी झाले असून, यात एका महिलेचा समावेश आहे. सर्व जखमींवर लातूर येथील रूग्णालयात उपचार सुरु आहेत.
कोल्हापूर येथील बजाज परिवार कारने (एमएच ०९ डीए ६३५०) शनिवारी सेनगाव येथून तेलगावमार्ग कोल्हापूरला जात होते. तेलगाव जवळच असलेल्या भोगलवाडी फाट्याजवळ त्यांची कार आली असता याठिकाणी असलेल्या पुलाजवळ त्यांच्या कारला अचानक एक कुत्रा आडवा आला. सदरील कुत्र्याला वाचवताना ही कार उलटून कारची चारही चाके वर झाली. यावेळी जाणाऱ्या येणाऱ्यांसह जवळच शेतात काम करणाºया नागरिकांनी कारमधील जखमी लोकांना बाहेर काढण्यासाठी मदत केली.
या अपघातामध्ये दिलीप दामोदर बजाज, विद्या दिलीप बजाज, गणेश दिलीप बजाज सर्व (रा. माळी कॉलनी कोल्हापूर), तर नंदकिशोर बाहेती (रा. बालाजीनगर वसमत) हे जखमी झाले आहेत. त्यांना प्रथम धारुर व नंतर लातूर येथील विवेकानंद रूग्णालयात उपचारार्थ दाखल करण्यात आले आहे. सध्या सर्वच जखमींवर उपचार सुरु आहेत.