नगर परिषद निवडणूक काँग्रेस स्वबळावर लढणार

परळी : प्रदेशाध्यक्ष नाना पटोले यांनी यापूर्वीच जाहीर केल्याने परळीनगर परिषदेची निवडणूक कुठल्याही पक्षाची आघाडी न करता स्वबळावर लढवून परळी नगर परिषदेवर काँग्रेसचा झेंडा फडकवणार असल्याचे प्रतिपादन काँग्रेसचे शहराध्यक्ष सय्यद हानिफ सय्यद करिम उर्फ बहादूर यांनी केले. काँग्रेस कमिटीच्या परळी शहराध्यक्षपदी नुकतीच सय्यद हानिफ सय्यद करिम उर्फ बहादूर यांची निवड झाली. शहराध्यक्षपदाची जवाबदारी स्वीकारताच शहर काँग्रेस कार्यकर्त्यांची त्यांनी व्यापक बैठक घेतली. यावेळी काँग्रेसचे ज्येष्ठ नेते बाबूराव मुंडे, वसंत मुंडे, प्रकाश देशमुख, विजय प्रसाद अवस्थी, ॲड. संजय रोडे उपस्थित होते.

पत्रकारांशी संवाद साधताना सय्यद हानिफ म्हणाले, राज्यात आघाडी सरकारमध्ये असलो तरी राज्यात पुढे होऊ घातलेल्या निवडणुका काँग्रेस स्वबळावर लढवणार असल्याचे प्रदेशाध्यक्ष पटोले यांनी यापूर्वीच जाहीर केलेले आहे. शहराच्या विविध नागरी प्रश्नांवर लवकरच पालकमंत्री धनंजय मुंडे यांची भेट घेणार असल्याचे त्यांनी सांगितले. काँग्रेस पक्षच भाजपाला सत्तेपासून दूर करू शकतो. पुन्हा एकदा काँग्रेस परळी शहरात जनतेचे कामे करुन गतवैभव आणल्या शिवाय गप्प बसणार नाही, असा विश्वास त्यांनी व्यक्त केला.

200821\20bed_5_20082021_14.jpg